𠵱家喺上海嘅英超球會曼城，為咗開拓中國市場，佢哋不惜遠赴中國打兩場友誼波，第1場對上海申花今日就打喇，但佢哋個前鋒華素爾就賣吓口乖，話孫繼海係成隊波跑步第2快嗰個，我求大俠就唔係好信喇！
明眼人都知曼城係為咗「我哋」而嚟，但華素爾接受內地傳媒訪問，竟然話老孫跑得好快，話自己第1，老孫就第2喎，估唔到平日咁正經嘅華素爾都識講笑！其實，曼城隊波快馬唔少，就算唔計華素爾，仲有杜利華冼佳亞、施比斯基、廸高夫等，點排老孫都好難上到頭3位喎。
冧中國球迷一舉兩得
華素爾咁講既係自譽速度驚人，又討吓中國球迷歡心，查實都一舉兩得；但佢如果讚老孫足球智慧高過人、走位意識值得學之類就無咁「礙耳」咯，起碼呢啲「優點」唔係人人睇得出嘛。
雖然老孫係咁多個外流華人中表現最好嗰個，但係你話曼城唔係為咗中國市場簽佢，我信你都唔信啦！曼城𠵱家去到上海，準備打兩場友誼波，第1場今晚就同主隊開波；6號就面對鹿島鹿角，啲波飛賣到32鎊（約450港元），自己之後返主場撼波圖嘅友賽都係賣15鎊1張（約220港元），預訂仲平3鎊㖭，你話上海之旅是咪似搵錢多過備戰啦！
「老孫呢鑊真係俾華素爾擺上枱啦，如果友賽時俾班申花仔狂放，唔單止冇面，連華素爾都要吐口水講多次！」