下個禮拜二8月8日，花旗國聯儲局又會再次開會決定加唔加息。今日，為大家嚟次快速回顧，自從聯儲局大約2年前開始加息之後，每次開會就每次加息。當然，大家最想知嘅係，下個禮拜二聯儲局會唔會加息。孫柏文已經多次講過，因花旗國通脹，特別係核心通脹指數，已經遠遠超越聯儲局講過嘅可接受程度，聯儲局一定會加息。仲要係唔單止會8月加，9月都加。
不過如果大家有機會睇國際輿論，今次「8月聯儲局究竟會唔會加息」呢個問題，我都相信係近年來，全球財經口水佬界裏面，意見分歧最大嘅一次。加或唔加，兩邊都有好多德高望重嘅財經口水佬前輩支持。而我覺得永遠都係最心水清、乜都知嘅債券市場，到前晚都係用債券價格同大家話唔會加息（64%機會唔加息，36%機會會加）。所以買我隻金手指今次篤錯，到呢一刻，都絕對仲有值博賠率。無可否認，如果呢期你有同我對賭，都真係有啲斬獲。哈、哈！Dammit！
都係買多啲黃金白銀
不過正當加息意見分歧咁大嘅時候，最好就係從最基本角度睇番中央銀行加息其實為乜原因。相信大家都應該知道，加唔加息呢啲貨幣政策決定，最終只係想達到保護該貨幣購買力呢個唯一目標。咁如果一間中央銀行，成功保護佢發行貨幣嘅購買力，大家就會見到通脹率受到控制。
大家可能覺得，我又講中央銀行唯一目標係控制通脹呢啲大家都知嘅嘢，又再次有呃字數之嫌。不過，我要提醒大家，如果睇番二十世紀初花旗國國會決定成立聯儲局嘅法例條文，其實聯儲局除咗要控制通脹，仲要盡量降低失業率。要到80年代，世界各國嘅建制先至明白，每次用貨幣政策催谷就業機會，只會令到通脹率更加唔受控制，最終破壞長遠經濟表現。最後要經過70年代，通脹飛升，不過經濟一樣呆滯嘅慘痛經驗，建制先至接受控制通脹為中央銀行唯一目標。
問題就喺呢度，八十年代初，世界各國成功控制通脹之後，每一次加息加到有經濟衰退時，通脹率就自然會跌。所以有好多財經口水佬，見到花旗國經濟表現疲弱，就會話聯儲局加完息。大家可能會問：「點解孫柏文都見到花旗國經濟疲弱，都仲要死都話聯儲局會加息？係唔係話70年代歷史重演？」問得好！其實，如果你相信「通脹飛升，不過經濟呆滯」會同時發生，而又相信中央銀行唯一目標係控制通脹，經濟再差都好少理，咁就算有多一百幾廿個表示經濟疲弱嘅數據出現，都會好似我咁，相信聯儲局會加息。
咁如果聯儲局唔理經濟表現，仲唔買股市跌？我曾經講過叫大家買熊證6204（回收價係恒指17500），因為我相信今年股市喺17300已經見頂，就算升盡都係去番17300（所以我冇叫大家買啱啱被回收，回收價係恒指17000嘅熊證6205），希望唔會被回收啦。
最後，如果聯儲局因經濟差而決定唔加息，即係放棄控制通脹。咁大家就要買多啲黃金同白銀。8月8日，聯儲局點做，大家都應該識得應變！
孫柏文