香港大學法律系嘅馮奔奔同曹喬菱，喺今年IELTS（國際英語水平測試）中攞滿分成為狀元，佢哋由拔萃小學、女拔萃中學到大學做咗同學十幾年，又係學校英文合唱團嘅成員，可謂校園twins。
兩個人由細到大都非常鍾意英文，無論睇電視劇、卡通片、小說、報紙定係聽歌唱歌都係英文，就連同daddy傾偈都會用英文，難怪考試前無特別準備都輕易攞滿分。
講到學英文嘅tips，馮奔奔話學英文最緊要先學拼音，而曹喬菱就話Bestseller嘅書通常都只係情節吸引，反而BookerPrize嘅書寫作手法仲好。
講開港大，截到6月底為止，港大校友合共捐咗成7,900萬蚊，用來挑戰「何鴻燊校友挑戰計劃」，若連同何鴻燊以一對一配對，同埋政府大學每籌到一蚊可以配對五毫子計算，港大閒閒哋已籌到1.975億蚊！