近幾年地產代理分行，開得快，執得仲快，分行員工併合再併合，工作環境同樓市一樣，唔多穩定。地區勢力祥益地產，老闆汪敦敬年初時已大派定心丸，今年會繼續有秩序擴張，經過世界盃最難嘅搵食時期，上個月佢仍然堅持話，年內會喺元朗同天水圍一帶繼續開新舖，最新一間啱啱搞完裝修嘅天水圍分行，就坐落喺天盛苑商場，仲玩吓住家feel新裝修概念，用「溫馨之家」去包裝，同傳統分行有好大分別。
先形容吓間舖，約700呎，係商場地下正門第一間，舖面有三面玻璃，用垂吊式宣傳架展示放盤資訊，最搶眼嘅就係價值四萬銀嘅四呎高水晶燈，好似入咗大富之家一樣，聽講好多街坊經過，都停步睇多兩眼，仲大讚裝潢夠新意㖭。
汪老闆之前都提過，呢個住家feel概念，係嚟自太座汪陳葉菁。祥益董事謝澤銘補充話，事頭婆嘅理念係，天盛苑係比較新嘅居屋，新買家多數係上車客，為咗令佢哋入到間舖，立即就感受到置業嘅喜悅，柔和溫暖嘅住家feel就最適合。
電郵地址：[email protected]