張栢芝自宣布與謝霆鋒復合後，為了博見報小情侶做騷的橋段日日新鮮，昨日栢芝在橫店的38度酷熱天氣下，竟以太陽帽、墨鏡、口罩和黑披肩將自己包到冚往探班，又再次接受電台訪問，反擊有意放棄她的中國星老闆向華強太太陳嵐，自稱做足公司要求的工作。 橫店直擊
張栢芝和謝霆鋒愛火重燃後，二人幾乎日日度橋自我宣傳。霆鋒昨早約7時半離開下榻的賓館，到橫店影視城繼續拍攝新劇《詠春》，他甫見記者即主動報料說：「我今日拍廠景，你哋咁曬咁辛苦。」昨日橫店最高氣溫達38度，有關部門更發出酷熱天氣警報，但栢芝卻無懼酷熱往片場探班，而且戴上口罩、太陽帽、架太陽鏡及以黑披肩包身，恍如發冷一樣。
騎呢造型似MJ
栢芝的一身造型驟看如米高積遜（MichaelJackson），令人摸不着頭腦，問她是否生病？她說：「我要漂白。」再問她帶了甚麼往探霆鋒班？她說：「太陽油。」莫非她想在片場為愛郎推油？
此外，栢芝昨日在橫店接受商台節目主持查小欣的電話訪問，被問到是否曾與中國星老闆向華強太太陳嵐通電話，栢芝疑惑地反問：「做乜要同佢傾電話，我𠵱家休息狀態，好少會覆電話，而且早排聽公司同事講向太去咗美國。」至於與經理人公司的合約問題，栢芝表現得一頭霧水地說：「乜點發展？點解咁問，點解會有續唔續約呢個消息？」
主持人查小欣指向太有感栢芝事業如日方中，卻只顧談戀愛，有意放棄栢芝。栢芝聞言說：「吓？向太親自講㗎，感情嘢唔講，𠵱家就講事業，咁多嘢搞出嚟，聽完有啲無奈，我了解向太性格，佢唔會咁講，同埋一定要有原因先解除合約，right？坦白講一句，藝人掛住拍拖而唔做公司要求嘅工作，咁就OK，咁先有原因，但係我由頭到尾都冇推過公司要求嘅工作，好似之前一齊拍《大隻佬》同《忘不了》，我忙到連返屋企刷牙嘅時間都冇。」
反口冇放棄事業
栢芝續說：「我拍《第601個電話》同《周璇》時，已經同霆鋒拍緊拖，講我話為感情放棄事業，覺唔覺得係傳媒有少少誇大咗呢？我根本上完全冇放棄事業，大家睇到，唔好睇傳媒報道，我真係時時都連續踩兩套戲，之前喺國內拍咗3、4個月戲，好想返嚟休息，而且想留多啲時間陪家姐個BB女，所有工作一路做緊，我只講一句，唔會為感情而放棄事業，我好尊重𠵱家嘅工作。」
對於英皇老闆楊受成指霆鋒身家半億足夠養起栢芝，栢芝說：「楊受成先生話霆鋒身家半億養得起張栢芝？以我了解阿仔（指霆鋒）性格，佢一定會話我都想，講太多感情事冇用，講完都係咁。」對於再次成為新聞人物，栢芝竟說：「我真係唔想，我真係想畀個願望我，真係唔想有記者，唔好跟我，唔好影我，當我透明啦，我真係好攰。」
上海fans迎鋒嫂
另一方面，霆鋒今日會現身尖沙嘴北京道，出席名牌DiorHomme於香港首間boutique的開幕活動。栢芝明日則要到上海宣傳新片《第601個電話》，有指她與霆鋒的影迷為支持偶像復合，有意分別穿上紅色及黃色衣服拉起「迎接鋒嫂」的橫額為她造勢。
採訪、攝影：娛樂突發組
