中國冒起，震動世界，追唔上形勢嘅隨時被人食落肚。即如以前外資收購內地民企就聽得多，中國企業走出去收購人，仲係日本公司，真係世界輪流轉。無錫尚德呢間專門製造光伏電池嘅江蘇民企，傳說用咗3億美金，吞併日本最大嘅光伏製造商MSK。
無錫尚德呢間民企，本身都好巴閉，事關佢係第一間喺紐約證券交易所上市嘅中國民營企業，老闆施正榮以160億人仔身家，被《福布斯》譽為「中國新首富」。
呢位新首富好推崇太陽能發電，佢間廠嘅門口路燈、廣告燈箱、警報系統、電話用電，全部都用太陽能供電，連鄉下間屋，都用咗15萬改裝太陽能，改裝後到家吓都未交過電費。今勻新首富殺過東瀛，在中日關係低潮中示威，算係為國爭光。