入得上海館子，唔食過鍋貼、葱油餅等一類滬式包點，硬係周身唔舒服！就連舖頭老闆都話，呢類包點做得好唔好，亦係能否縛緊客仔嘅撒手鐧！今日上海菜系列最後一擊，就搵嚟上海包點名廚，教大家整滬式特色包點；以後學識屋企自己煮，包保幫你年終慳番唔少逛館子費！
記者︰劉昱蘭
攝影︰伍慶泉
示範︰屋裡廂張正平師傅（25689098）
（下周預告：風味潮州菜）
雙釀糰四重口感
價錢︰$12/5人
需時︰20分鐘（未計蒸糯米時間）
材料︰
糯米粉/豆沙/黑芝麻/椰絲各5両、熱水1両、糖少許
1.做粉皮
糯米粉拌熱水後，以大火蒸好，然後搓麵糰，約搓10分鐘。
2.面層豆沙
取出適量麵糰壓平，放上適量豆沙包成圓球狀，再將之壓扁。
3.核心芝麻
黑芝麻打碎，放糖拌勻後落鑊炒香，取出適量放在豆沙麵糰上，搓成圓球狀，撒上椰絲。
貼士︰
蒸糯米約需45分鐘，驚未蒸好就寧願再蒸耐啲，如果生的話入口食到粉粉哋就無謂喇！
鍋貼香煎勁脆口
價錢︰$20/5人
需時︰20分鐘
材料︰
麵粉10両、熱水3両、豬肉5両、上湯1両、鹽1錢、糖11/2錢、胡椒粉/葱粒/薑絲各少許
1.拌豬肉餡
上湯放涼，與鹽、糖、胡椒粉、葱和薑拌勻，豬肉剁好後加入上湯攪勻。
2.包餃
麵粉與熱水拌好後搓粉，取出適量壓扁作皮，放上豬肉包好。
3.生煎
先以油燒紅鑊，放進鍋貼後，加入適量水煎5分鐘。
包鍋貼講手勢
Step1：
先用拇指及食指揑好鍋貼頂。
Step2：
然後用虎口位揑實兩邊。
Step3：
最後兩手的虎口同時夾實兩旁向內一屈即成。
貼士︰
唔想搓麵粉，可以用現成的水餃皮代替。
葱油餅鬆香可口
價錢︰$8/5人
需時︰20分鐘
材料︰
麵粉5両、熱水1.5両、鹽/葱/油各1両
1.搓麵粉
麵粉與熱水拌好後搓粉，取出適量壓成條狀。
2.捲餅
麵皮上掃一層油，撒上少許葱及鹽後捲好再壓扁，然後捲及壓的步驟再重複一次。
3.煎餅
鑊上加上適量油後煎餅10分鐘，煎至金黃色即可。
貼士︰
搓完麵粉後，最好等佢20分鐘先再捲餅，畀啲時間個麵粉發得更均勻。
來自百三年老字號沈大成
講到滬式包點，老上海必會叫你一試家傳戶曉的沈大成！130年老字號，小籠包、餛飩係佢哋至撚手小食，傳統風味街知巷聞，而且仲以雙釀糰一甜點，贏得了1996年中國商業部優質點心的榮譽。
做學師似中科舉
今日教大家做包點的張師傅，就是從這條木人巷中打出來的：「想喺沈大成做學師，首先要通過做點心技巧嘅筆試，大家未聽過吧！有啲人考咗廿多年，都未能一償喺度做學師嘅心願！」嚴格程度簡直好似古人考科舉，認真巴閉！
張師傅話自己從19歲考入沈大成，一做就是24年，其間由最低級的學徒，一直考到頂級的點心高級廚師；「做上海包點，最緊要夠細心，因為每個包餃甚至甜點，都有一定的製作手勢，此亦是靈魂所在！」