別問我影維港夜景有何心得，但求靚機、腳架及閃燈在手，都叫睇得！但對每日喺海旁揸機搵食嘅劉師傅（阿叔）嚟講，就未必同意！佢十幾歲出來搵食，幫過無數旅客影相，作品好多；但手上嗰部搵食架生，估唔到只係NikonCP8400！趁配備500萬像素嘅LGKG920啱啱落場，立即畀佢試玩；睇完阿叔都驚歎相質有如斯級數，問佢有冇擔心會被傳統DC威脅，搞到飯碗不保，仍死撐未驚過！
記者：陳國輝
攝影：陳陶鈞
ImageGirl：家祺
自Chocolate系列推出以來，LG喺本港名氣可謂大增！要食住個勢，今次就唔可以再玩款，KG920轉攻影相分唇，最震撼係內置現時最勁嘅500像素CCD鏡頭，仲搭多個等同SEK800i級數嘅XenonFlash，兼玩同步閃燈，影日頭靚景不在話下，今次仲應付到Snapshot友至怕嘅夜間環境，成班Friends走去維港影夜景就最合適不過！至於會唔會搶走海旁一帶嘅影相生意，咁就不得而知喇！
手動操作花臣多
KG920機身按鍵似專為DC而設，如閃燈、自拍時間、數碼變焦等經常用到嘅分唇掣，只要啓動相機，㩒一下即可隨意轉換，情況似用卡片DC咁容易，玩上手好User-friendly！想影得「PRO」啲，仲可以進行Manual操作。手機已內置兩層設定模式，第1層係最基本設定，如解像度、連拍、時間掣及白平衡等；再㩒多一下設定鍵，就會進入第2層模式，內容包括對焦方式、閃燈類型、ISO控制等，對DC新丁嚟講，查實好多都用唔着，反而想拍攝高難度嘅夜景或者玩Effect嗰陣，咁會啱Feel好多！
阿叔反駁：各施各法啫！
影靚相，不外乎貴價靚器材！但放喺阿叔檔口面前嘅作品，原來大部份係用Nikon8400操刀。「影夜景又好，日間風景亦好，用乜嘢器材唔重要，各施各法嘅啫！」8400雖然唔屬於專業級D-SLR，但佢話勝在擁有24mm廣角鏡，咁Wide最啱用嚟影維港景色，作為搵食架生當然適合不過啦！跟着，佢又拎起KG920幫靚女Model影相，但因甚少用影相手機，突然間出現雞手鴨腳情況，佢表示影出嚟嘅相質雖然唔錯，不過閃燈唔夠火力，要「哄」到好埋先打到光，佢仲話影到客人塊面黑晒係大忌嚟㗎！
阿叔試相區
拎住部KG920拍攝唔同環境，效果究竟會係點呢？即睇！阿叔親自操刀！
手機VS傳統DC
用手機拍出嚟，Model面色稍偏黃，整體感覺尚算自然，但為遷就閃燈火力不足問題，需要行近少少嚟影。
日夜景測試
比較日間和晚間嘅效果，發現夜景感覺特別有氣氛，而且右下角嘅欄杆位仲算清楚，只係線條冇咁實淨。
贏經驗！教靚女擺「鋪屎」
喺採訪過程中，小記發現阿叔除咗熟悉DC運用，另一強項係教客人擺「鋪屎」，就算手機影得點靚都好，始終經驗贏晒！
拍檔點睇？
另一位拍檔馬師傅，由畫師轉行做攝影已有數年，對於影相手機能否取代傳統DC，似乎並唔擔心。「影靚相唔單止器材要講究，仲需要配合色彩、色溫、層次感、線條各方面，既然客人搵得我哋幫佢影相，當然有佢道理啦！」
Profile
制式：GSM900/1800/1900
體積：108×50×18mm
重量：150g
屏幕：26萬色TFT
通話時間：180分鐘 備用時間：180小時
主要功能：500萬像素CCD相機、閃燈同步、自動對焦、180度機身旋轉、30fps動畫攝錄、miniSD記憶卡、MP3播放器、藍芽
查詢：LG（35437777）
售賣點：T-OneMobile（旺角先達廣場地下G60舖）
