香港人出晒名勤力，不輕易言休，唔知係咪咁，大家對退休嘅準備都幾矛盾，富達基金最近嘅調查，訪問咗204個55歲以上嘅準退休及已退休人士，有73%人認同退休生活要過得舒服，應該有全面投資計劃，但係有76%嘅人唔會主動搵人幫手。
喺冇專家教路下，八成七嘅人有諗買股票，或者放喺銀行收息。三分一準退休人士就話退休唔會投資，食穀種就夠。對於退休後要幾多使費，四成受訪者「矇查查」。
55%嘅人計唔掂條數，居然仍拍晒心口話覺得儲夠錢退休，富達個人理財行政董事鄭潘行端都要寫個「服」字。
鄭太話10年後，退休人口有成120萬，如果啲人仲係咁「烏啄啄」就麻煩。佢好豪氣咁話，佢哋有7位專責投資顧問，搵佢哋傾成日都得，最尾唔幫襯拍籮柚亦得，公司賺少啲冇乜所謂喎。華華就戥呢班「雪姑七友」慘啦，分分鐘忙到有氣冇掟唞。