賭王何鴻燊有份投資嘅港聯航空舊年8月開檔，飛廣州（一早摺咗）、杭州、南京等內地二三線城市，玩咗1年勁蝕錢，終於頂唔順，要將45%股份賣畀大陸嘅海南航空集團。可見中國市場雖大，但唔係做乜都掂。
專做中港航線嘅港龍航空，都要靠上海同北京兩條黃金線撐起成個內地網絡，先有錢賺，港聯淨係做二三線內地同東南亞城市，真係好易流血不止。加上國泰航空年中買起港龍，打算提供中/港/國際一條龍服務，港聯呢啲未湊大嘅公司更難有生存空間。
搵海南止血
華華聞說，港聯股東其實心灰意冷想唔玩，但作為香港航空公司，香港政府唔准佢將控制性股權賣畀人，賭王外甥兼港聯惟有盡賣45%，攞番些少本，好過執咗佢血本無歸。
更早之前，本港另一間廉價航空公司中富航空，亦都將45%股權賣畀海航集團。據講，海航打算收起港聯同中富，壯大規模注入一間叫做新華嘅航空集團，第日上市集資。但係成件事嘅透明度其實幾低，市場完全唔知呢幾間航空公司想點，究竟有乜生意上嘅發展大計。
港聯行政總裁謝天賜噚晚同華華講，希望引入海航集團之後，能夠加強港聯喺內地嘅銷售渠道，令多啲內地同胞買到港聯嘅機票，盡快收支平衡。不過，𠵱家每桶飛機油貴到成90幾美元（飛機油貴過國際油價20美元），華華真係要講句：Godblessyou。
李華華
