我未去過馬灣，知道要山長水遠入馬灣，連聲叫苦，問編輯：「乜地方？郊野公園嚟㗎？」好無知。別怪我，我去慣年輕人蒲點尖沙嘴銅鑼灣，馬灣在我心目中只是荒山野嶺，還心忖：「去馬灣影相，會唔會淨係見到老村民同中年遊客？」嗚，原來我錯了，今日介紹的3間食肆，全由年輕人擔大旗，馬灣──原來好Young！
記者：方綺君
攝影：陳偉強
模特兒：Ruby
Backstreet好Moody
住馬灣其實不算方便，既然食肆選擇少，自己開舖可能大有作為，所以老闆關生就與同是馬灣居民的朋友開「BackstreetCafe」。入Cafe，感覺是怪怪的，裝修帶少許亞洲兼歐洲的設計風格，但怪得來又很協調順眼。負責設計裝修的Brian說︰「歐洲人偏向鍾意紅色，所以你會見到間舖以紅色做主調。我行外國好流行嘅Cafegallery概念，如果睇中店裏面嘅心水裝飾，甚至係傢俬，客人都可以買返屋企。」雖然紅色好Sharp，不過在富情調的燈光襯托下，立即變得Moody。食物選擇不少，我認為甜品和飲品都做得比較出色，咖啡是自家磨製，店中一班馬灣年輕人又會跟你吹吹水，廚師阿鋒尤其親切。
1.酒醉櫻桃$38
即用白酒、櫻桃和火龍果製成的果凍，有酒香，入口卻沒濃烈酒味，絕對不會吃醉人，吃時記得蘸少許忌廉和車厘子汁。
2.後街特色牛柳配紅酒汁$60
烘過的矮瓜和青瓜，略生，但多汁，阿根廷牛柳牛味甚濃，我最欣賞廚師阿鋒弄的薯仔，軟硬適中，入口好香。
3.乳酪果蟹子三文魚沙律$48
三文魚夠新鮮大件，乳酪拌少許沙律醬再與蘋果一同拌勻，酸酸甜甜有咬口，比吃一般的沙律醬健康得多。
BackstreetCafe（34461121）
地址︰馬灣大街村218號地下
營業時間︰8:00am-10:00pm
座位︰約20位
亞洲廚房：主打新加坡菜
「亞洲廚房」，一聽店名已估到主打馬來西亞和泰國等亞洲各國美食，不過店中最精采的一定是新加坡菜。為甚麼？因為店舖三父子都和新加坡有關連，22歲的細仔阿銨話︰「我婆婆係新加坡人。」身為四分一個新加坡人，阿銨細細個就開始跟婆婆吃盡新加坡美食，亦因此跟婆婆學了一招半式，雖然他不是店中大廚，但偶爾也會落廚房幫忙：「只要你鍾意食某一道菜，就會希望將呢道菜整到最好味先拎畀客人食，我講緊嘅係海南雞飯。」
海南雞飯$45
鎮店之寶，指定用2斤12両走地雞，因為肥瘦最適中，用雞湯浸過肉質嫩滑，一件雞一啖油飯吃好歎，伴碟豉油專程由新加坡買回來，好香。
肉骨茶$42
以前新加坡窮人有病無錢買藥，就會煲肉骨茶醫小病。這裏的肉骨茶足5人份量，湯底日煲夜煲好入味，記得浸油炸鬼吃，骨頭也不要浪費，𦧲亁𦧲淨至停口。
蕉葉燒沙鯭魚$60
炸熟沙鯭魚，撒洋葱、辣椒用蕉葉燒烘15分鐘，自製森巴醬入口味道似吃鹹魚，別急着吞，慢慢咀嚼，方吃到魚的鮮味。
亞洲廚房（34461122）
地址︰馬灣珀林路田寮新村49號地下
營業時間︰12:00nn-2:30pm，6:00pm-10:30pm
座位︰25個
CoffeePlus：廚師周身刀
碼頭廣場旁邊有數間食肆，當中以「CoffeePlus」的格局最Relax。大廚是20歲的阿勇，問佢最拿手是甚麼菜式？他說：「乜都要識煮，唔係點做得住呀？」細看餐牌，對了，日間提供的以西餐為多，夜晚還會加插東南亞美食，誰說年紀輕便功夫差？阿勇就是好例子，周身刀，張張利。
煙三文魚薄餅$68
煙三文魚薄餅老實講不特別，不過餅皮是用手搓，所以焗出來特別鬆軟兼嚐到一般即用餅皮沒有的粉香，工序繁複好有誠意。
焗羊架配迷迭香汁$58
用羊味更濃的蒙古羊，煎香再焗，肉質軟腍，一𦧲整條骨滑出，伴碟的薯茸混了甘笋汁，入口慢慢嗒，甘笋味會慢慢湧入味蕾。
焗藍莓芝士蛋糕$30
一般用菲力芝士做蛋糕，但阿勇用味道較濃的Neufchatelcheese，芝士略欠硬淨，聽到我咁講，阿勇話：「收到，會再改良。」
CoffeePlus私家咖啡（29863123）
地址︰馬灣珀麗灣碼頭廣場P1號舖
營業時間︰7:00am-10:00pm
座位：40個
交通
1.中環2號碼頭或荃灣碼頭乘渡輪往珀麗灣
2.青衣機鐵站C出口、葵芳新都會廣場、荃灣地鐵站乘巴士往珀麗灣
