軟硬天師復合開騷獲萬人潮拜，順勢掀起本地組合回歸熱潮，經典樂隊達明一派原定明晚在對方尾場演唱會中擔任嘉賓，但成員劉以達前日在一篇周刊訪問中大發牢騷，揚言自己多年來未受尊重，crossover騷由黃耀明和林海峰揸弗，未料訪問竟成導火線，前日劉以達獲商台通知毋須出席軟硬騷，令達明不和暗戰火速現形。
商台有份主辦的「LongTimeNoSee軟硬天師」10場紅館演唱會連日爆滿，林海峰和葛民輝因不和而拆夥11年，但復合開騷卻令他們及主辦商賺到笑。商台食髓知味，早已敲定明年由軟硬天師×達明一派開騷𢱑銀，林海峰去年10月在個人talkshow中更事先張揚，邀請達明成員黃耀明和劉以達上台，宣布達明加軟硬明年crossover演出，慶賀香港回歸10周年。
不滿明哥
「點解唔由單飛計起」
商台為替軟硬×達明騷響頭炮，原定在明晚舉行的軟硬尾場演唱會中，安排擔任嘉賓的達明壓軸登場，據悉在軟硬末段中，會再披紅、黃超人戰衣，與身穿螢光橙超人衫的劉以達及穿螢光綠超人衫的黃耀明一同出現升降舞台，之後達明獻唱兩首歌曲，商台高層俞琤也會上台。
大前日達明兩位成員已分別試穿超人戰衣，當劉以達試穿螢光橙超人衫戴頭盔影相時，身邊的黃耀明還搞笑地掐對方手臂。原以為萬事俱備，未料前日下午出版的周刊中，刊登了劉以達的個人專訪，他在訪問中大發牢騷，抱怨自己在達明一派中不被尊重，結果同日傍晚劉以達即接商台電話通知昨日取消綵排，明晚也毋須亮相軟硬騷。
劉以達在訪問中聲稱黃耀明每次推出個人精選碟都收錄達明作品，有誤導歌迷之嫌，「好似想人以為係黃耀明作嘅歌，點解你唔由自己單飛計起，春光乍洩晒佢。」言談間劉以達又暗示他總是屬於被知會的一個，正如軟硬×達明騷，他形容「可以只由林海峰加黃耀明傾掂數就得」，難怪他直認與黃耀明火花不再。
達明一派於85年組成，91年因為意見分歧拆夥，95年以10周年名義重組，去年20周年復合開騷時黃耀明仍做主導，明年開騷又歷史重演，如今劉以達的老實話卻疑惹起他人不滿而被飛，難怪昨日劉以達顯得有口難言。
達叔無奈
「星期六唔使我出現」
記者昨日致電劉以達求證是否被飛出明晚尾場軟硬騷時，他說：「我前日試着超人衫，噚日商台打電話畀我，話星期六唔使我出現，今日綵排都唔使啦，我覺得莫名奇妙。」問劉以達是否因為接受周刊訪問而出事？他說：「唔知，佢哋（商台）打嚟，乜都唔講。」今次做嘉賓「撻Q」，令明年軟硬×達明騷隨時泡湯，劉以達無奈說：「其他嘢唔知。」問他是否和黃耀明合作有問題？劉以達只匆匆說：「冇問題，係咁多，唔講啦。」
商台助理總經理甘菁菁昨晚回應說：「我哋係有請過達明做嘉賓，希望喺尾場嘅尾段做一個預告，代表07年同軟硬有啲合作，但軟硬演唱會成個氣氛咁澎湃，唔知最尾時候會hot成點，如果未能控制現場氣氛，又唔知可唔可以做到預期中咁理想，所以至決定唔做。我哋都有同達明分別講番晒成件事，佢哋亦都同意。」據知明晚擔任軟硬尾場的嘉賓為郭富城。
採訪：林妃
