風大雨大，中環班消息人士個個匿埋，冇嘢八，不如同大家介紹一位明日之星──天文台台長林超英。呢位英皇狀元、港大精英、倫敦帝國學院氣象學高材生，除咗善觀天象，更加識得睇眉頭眼額。特區政府強政勵治，煲呔老闆用人之際，又點會糟蹋咁優秀人才呢。經過昨日「派比安」嘅考驗之後，林台長官升三級，指日可待。
在北京眼中失分事大
話說「派比安」前晚殺入香港警戒範圍，但係天文台處變不驚。就算國泰港龍飛機停晒航、汀九橋封埋路、貨櫃場冧晒檔、棚架搖搖欲墜，陣風吹到反轉，啲雨又落到狗屎咁，天文台都係三號波，用科學嘅態度去對抗一眾無知刁民嘅責難。
咁八方就支持天文台。事關偵測颱風係科學，但掛唔掛風球就係藝術，要考慮緩急輕重。眼下特區頭號大事，唔係水浸唔係冧樹呢啲濕碎嘢，而係成個政府違憲，准許執法人員非法偷聽搜集證據。由於大老爺揸正嚟做，判長毛勝訴，政府惟有迫班尊貴議員日日趕工三讀立法，煲呔更親自發信畀議員請大家幫手，務求在下周二之前大石壓死蟹。咁你話天文台掛個8號波，等班唔生性嘅民主派乘機散水唔開會，到時拉唔到蠱惑仔事小，煲呔在北京眼中失分就大件事啦。
所以今勻天文台力排眾議唔學澳門拒掛8號風球，真係為特區治安特首前程立下重大功勞。煲呔他日論功行賞，一定唔會漏咗林超英台長。話唔定過多兩日條例通過，雨過天青，特首心情大佳，請台長去粉嶺別墅食飯，再去米埔觀鳥，攜手郊遊，討論天文雀學。