愛到失控的張栢芝現正於橫店黐實忙於拍劇的謝霆鋒，前晚兩人在酒店癡纏一晚後，昨日繼續「做騷」，公私兩忙的霆鋒拍戲時累得頻頻瞌眼瞓，但他仍不忘展示有份擔任代言人的飲品；至於栢芝在傳媒面前篤波，不過未知她是否希望做封面女郎，竟查問為何無雜誌記者。 橫店直擊
謝霆鋒和張栢芝自透過電台訪問承認復合後，兩人愛得高調，前日霆鋒在內地橫店拍攝電視劇《詠春》，栢芝黐實陪開工，全程做真人騷任影唔嬲，晚上兩人前後腳返抵下榻的貴賓樓，經過11小時纏綿後，霆鋒在昨早7時多已開工拍劇，雖然他曾被女友大讚「好勁」，但也難掩倦容。
博出鏡
埋怨冇雜誌記者
現為百事可樂代言人的霆鋒，昨早特別穿上印有美女飲百事的T恤，隨隊到陽下陳村外景場地開工，當他坐在樹陰下整理古裝頭時，不忘故技重施，在傳媒鏡頭前將汽水左搖右晃，而患有哮喘的他更食雪茄，認真騎呢。其後霆鋒換上孝服拍攝喪父場面，雖然勉強抖擻精神，又與工作人員玩詠春過兩招，但拍了一會已忍不住「放蚊」，在空檔時更「攤屍」大覺瞓。霆鋒一直拍至晚上7時才返回酒店，記者問他是否不夠精神時，他只笑而不語。
另一邊廂的栢芝未有隨愛郎開工，昨午近2時才現身，她先派助手探路，向在酒店等候的記者問道：「你哋有邊幾間喺度呀？佢𠵱家打緊波，影唔影呀？」原來戴墨鏡的栢芝已帶齊音響駐守室內桌球室，邊聽音樂邊與女助手篤波，吸引不少職員及住客上前索簽名。
球技水皮的栢芝前後花了兩小時做騷，打足三盤波才捨得「收工」，臨上樓入房前還說：「見你哋咁辛苦，特登嚟畀你哋影吓。」其後她望一望在場傳媒，發現連電視台在內只得約10多人，曾自視為封面女郎、經常成為頭條人物的栢芝未知是否懷疑號召力減弱抑或嫌未夠墟冚，竟問記者：「冇雜誌呀？」隨後她的助手再問記者：「點解雜誌唔嚟嘅？」看來栢芝相當在意能否成為傳媒焦點。
其實霆鋒追女仔向來有鋪「探班」癮，01年與王菲撻着時，他曾到錄音室陪對方過生日，03年傳與王菲復合，之後也常有人目睹霆鋒為冧王菲，屢次探班獻殷勤。沒想到風水輪流轉，在下周二王菲37歲牛一前夕，栢芝卻成跟得女友，黐實愛郎開工。
撐星途
傳拉栢芝過英皇
現時栢芝和霆鋒雙劍合璧再成新聞人物，兩人互撐告急的星途，昨日有內地報道指英皇幕後操控鋒芝戀做騷，好讓霆鋒人氣反彈，同時也有消息指英皇正透過霆鋒拉攏自由身的栢芝加盟英皇，昨天霆鋒經理人霍汶希（Mani）在新人泳兒記者會上，問及會否簽約栢芝時，她竟說：「好難答喎。」可見其態度亦不否定。對於霆鋒被指與栢芝不排除閃電結婚，Mani說：「未，都冇計劃結婚住，我都有問阿仔（指霆鋒）你請飲咩？佢話唔係，返嚟請小欣姐飲嘢啫，霆鋒日日做嘢開兩組戲，邊有造人吖，總之唔會閃電結婚，會專注工作先。」
採訪、攝影：娛樂突發組
