廣東省省長黃華華噚日總結第九次粵港合作聯席會議見記者，話自己對改善珠三角污染問題充滿信心。佢又舉例，話珠江水以前嚴重污染，經過一番努力，𠵱家水質已經好到可以游水，佢早前就親率領三千人橫渡珠江，仲專登含住啖珠江水試一試，雖然無吞落肚，但就猛話：「口感好好！」
黃華華一邊回味珠江水，一邊又坦白講，𠵱家珠江污染仲好嚴重，其實唔適合游水，佢會努力改善水質，屆時再請煲呔一齊暢泳珠江。「精甩尾」嘅煲呔一聽，即刻話一定奉陪，但係又補番句話珠江水急，加上自謙游水冇省長咁叻，驚住會浸死。咁即係唔畀面啦。
煲呔知道講多咗，馬上打圓場，反客為主邀華華來港去水清沙幼嘅淺水灣，對方二話不說，即刻話「冇問題」。八方建議煲呔，快啲同三司十一局移師去淺水灣開早禱會，一邊聽滙報，一邊練水，到時華華大軍殺到，都唔會太失禮。肥龍加肥平加肥馬，肯定夠晒浮力，加上冬冬同俞小姐嘅三點式，八方保證，上頭版冇問題。