估吓呢度係邊度？赤柱？西貢？南丫島？通通都唔係！如果鏡頭影橫少少，會見到側邊有間學校，再影遠少少，仲會見到個公園仔，見到班老伯伯玩雀。開估嘞，呢間咁別致嘅Cafe，其實位於熱鬧煩囂嘅荃灣。呢間Cafe要花有花，要草有草，仲有嗰種乜都慢半拍嘅氣氛。一入店，老闆娘一味掛住捲，我就一味掛住Hea，Hea住食蘋果雞柳卷……
記者︰方綺君
攝影︰陳陶鈞
模特兒︰Algie
舒服到想瞓番覺
香港人日忙夜忙，放假，好多時都會山長水遠走入赤柱、南丫島，唞啖新鮮空氣，放低工作享受慢半拍嘅生活。荃灣，老實，畀人嘅感覺離不開熱鬧、嘈吵、烏煙瘴氣，點估到呢度會有間咁外國鄉村Feel嘅「CafeTrois」？入店，睇裝修，感覺好舒服，一睇已經知道好好Hea，見埋老闆娘Cora，見佢一身裝扮都知道係「閒」人一個，說話慢四分一拍、行路慢半拍。佢覺得荃灣太車水馬龍︰「我開Cafe都係想提供個舒服啲嘅地方畀人Hea吓，好多客人嚟幫襯，都係貪呢度有種身處赤柱、離島嘅感覺。」係喎，入到嚟，昨夜工作至凌晨嘅我，喺輕快音樂底下，都想搵個靚位眠一眠。
迫你食生蔬水果
唔係我誇張，Cora仲話：「好多客人Order完嘢食，食飽歎杯咖啡，就可以坐足一個下午，對着街外發呆，甚至試過舒服到瞓着咗。」講到食物方面，Cafe一樣走隨心所欲路線，乜嘢叫隨心所欲？一日去兩次街市嘅Cora話：「睇到有乜新鮮食材就買返Cafe，煮乜？自由發揮喇。」所以食客日日到Cafe都可能有新發現。我留意到Cafe嘅廚師都係媽媽級女士，阿媽煮嘢食最注重健康，你有無見過整雞翼薯條畀仔女食嘅媽媽呀？呢度嘅菜式一味靠捲，捲乜？捲蔬菜水果！廚師唔畀蔬菜水果淪為陪襯品，用肉類捲住蔬菜同生果上碟，一來食得健康，二來局你食埋蔬菜水果落肚，夠健康嘞啩？不過又老實，以下介紹嘅菜式價錢比附近食肆略高，但悠閒格局喺荃灣難搵，我覺得好抵撐。
蘋果雞柳卷意粉$58
又係個肉類同水果Crossover嘅菜式，啖啖肉好膩，加蘋果不但減少油膩感覺，果汁亦令雞肉味更突出，甜甜哋更添肉香。
1.煙肉哈密瓜卷配千島直通粉$58
類似意大利菜巴馬火腿做法，就咁食煙肉太鹹，捲住哈密瓜一齊擺入口，可以中和味道，水果多汁咬落爽口。
2.魚柳蘆笋卷拌香芒椰汁飯$68
魚柳和蘆笋一向係絕配，魚柳略煎至焦焦哋，同鮮蘆笋味道好夾，椰汁香飯唔太甜，入口唔會太黐𣲷𣲷。
3.香橙鴨胸卷配薯餅$68
鴨胸始終肉厚，一下子食太多會好飽滯，加塊去皮橙再淋自製醋汁就唔同嘞，酸酸甜甜登時醒神開胃。
4.咖喱牛柳釀南瓜配蒜茸包$78
此菜一上，我大嗌︰「份量咁大，三個女仔一齊食都得喎。」Cora話見過有客可以一個人食晒成個咖喱不特止，仲可以連南瓜都食埋。不過咖喱只香不辣，咁易入口，Hea吓Hea吓的確可以食得晒。
5.菠蘿釀雞翼配田園沙律$58
我至Like，一來我懶，鍾意無骨雞翼唔使吐骨，二來雞翼釀入火腿同菠蘿等，入口有多重惹味，最緊要係啖啖肉，有排𡁻嘛。
睇埋裝修
食客有Say
搵食攻略
CafeTrois（24080731）
地址︰荃灣三陂坊12號地下（聖芳濟中學後面）
交通：荃灣地鐵站B出口，往城市中心方向行10分鐘
座位︰35個
營業時間︰星期一至六12:00nn-11:00pm，星期日休息
最好賣︰鹹豬手、羊架