侍仔：我個表弟噚晚話想轉學校讀喎，佢話𠵱家嗰間唔太出名，自己成績好所以想轉校。
招積域：你表弟幾大呀？
侍仔：16、7歲度啦。
菠蘿文：佢屋企人點樣睇呢？
侍仔：佢哋都想轉，話希望個仔接受更好嘅教育。但我就唔同意啦，讀書睇自己，轉咗校要重新適應，可能成績仲差咗。
招積域：係人都望高處，禾確特同你表弟一樣咁大，佢自己當初都想轉阿仙奴呢類大球會。
禾確特留修咸頓更佳
菠蘿文：嗰陣都以為佢掂㗎，但咁耐以來未見過佢踢一隊。
侍仔：我表弟應以禾確特為鑑，唔好太急於轉校，雖然自己成績真係好掂，但轉環境之後嘅嘢無人知。修咸頓領隊佐治貝利講得啱，禾確特需要時間去進步同成熟，轉大球會機會減少，再唔係就俾人當波咁外借。以前修咸頓畀佢嘅環境真係唔錯，只係佢全家都想禾確特轉會。
招積域：太早成名，會唔會真係壞事呢？
菠蘿文：朗尼呢個衰仔聽到佐治貝利咁講，應該反省吓自己喺自傳度狂轟莫耶斯係幾咁無良心！
侍仔：佐治貝利同莫耶斯一樣都想𡃁仔好，但命運就有少少分別。朗尼上位唔使講，仲有費Sir照住；禾確特喺阿仙奴真係需要時間去證明能力，畢竟嗰度有能力嘅後生仔太多。
招積域：我覺得佢會變做另一個賓納。
侍仔：又唔好咁悲觀，雲格會畀機會佢嘅。
菠蘿文：但佐治講嘢幾有point，當年李察胡禮又係去咗阿仙奴，之後幾年無晒影。好多以「潛質新人」姿態去咗阿仙奴嘅，最後都係銷聲匿迹。
侍仔：希望禾確特唔好步李察胡禮後塵啦，如果唔係佢趁後生可以返學校讀吓書。
文︰高洛文