保釣行動委員會噚日誓師，將喺8月15日日本投降紀念日登陸釣魚台宣示主權。肯定會隨「保釣二號」出征東海嘅長毛梁國雄噚日話，收到風日相小泉即將卸任，再無顧忌，將對保釣二號「迎頭痛擊、做到好絕」，所以不論花三萬銀隨團嘅記者抑或三千蚊上船保釣嘅市民，全部要簽「生死狀」先可起航。
𠵱家停泊喺廣東汕尾嘅保釣二號，雖然已經修理好，並計劃下周一返港，但長毛一個知情嘅老友同佢講：「𠵱家中日關係向好，你哋要出海冇咁容易，隻船實行凍過水……」事實上，柯華、阿牛等人到𠵱家仲未同北京、汕尾或中聯辦接觸過，行動會唔會受到阻撓，仍屬未知數。
長毛仲好感慨咁話：「日本人會點做我唔知，我只希望隻船可以順利嚟香港，載住全球華人8年嘅心血，到釣魚台表達義憤，唔好節外生枝，否則日本人就最開心。」