早幾個月，香港曾經返過首部iPod專用嘅膽機（真空管擴音機），以四方純白賣相吸引到唔少iPod機主入貨。點知㗎仔繼續發揚光大，推出一款更型更搶眼嘅iPod膽機，名為iBlueTube，兩邊各裝一顆真空管，令重播音樂時帶有較舒服嘅「暖」意，而且啓動時兩邊均會發出淡淡藍光，黑暗環境睇起上嚟令人有點冰冷感覺，對比冷暖下有點相映成趣之味道。
勝在好聲兼慳位
iBlueTube採用長條形機身設計，體積只有295×130×68mm，重量亦只係650g，跟蘋果官方嘅iPodHi-Fi比，雖少了一分霸氣及協調感，不過就算配埋喇叭都仍然好慳位，就算擺喺房仔或書枱上，都唔會「妹仔大過主人婆」。輸出接頭方面，以普通AV「蓮花插」駁左右聲道喇叭、USB則係駁電腦之用，而機背更設有S-Video，畀你駁電視輸出iPod內嘅影像。
換膽不求人
若然不慎弄破真空管，又或隨日子而老化，都可自行手動更換新嘅真空管，更甚者大可按自己喜好，換入更高檔次嘅真空管，只須拆開兩邊透明膠蓋便可，喺更換上亦係相當之方便。跟機附送承托各款iPod嘅Dock，除傳輸音樂外，亦具有充電作用，更由第三代iPod打後型號都支援，包括nano同mini（Shuffle、Video除外），相信好多機主都啱用。
記者：徐影龍
相關網址：www.thanko.jp/ibluetube/