「咖啡之所以做到全世界都咁多人飲，係因為外國人可以做到杯杯都咁好飲。」Franco咁講不無道理，唔係點解啲咖啡連鎖店可以開到成行成市，依然可以不斷擴張？皆因發明咗一部咖啡機，就可以做到杯杯相同味道。「外國人講原則，講Standard，無論做一杯咖啡，定係100杯咖啡，都要做到一樣咁好飲。中國茶始終用人手沖，通常又大桶大桶咁泡茶，務求大量供應，茶葉長時間浸泡就唔新鮮，增加機會釋放茶鹼、單寧酸同咖啡因等不利健康物質，外國人唔Buy，所以中國茶喺外國唔會好流行。」
要中國茶類飲品同咖啡睇齊，就要講究茶葉選擇、水溫控制、泡茶時間。Franco一副專業口吻：「一杯茶，我認為要符合新鮮、口味創新、衞生、快捷同質優保證五項要求，我吸收傳統Espresso咖啡機優點，首創一部適合各類茶種嘅鮮茶機Teapresso。」𠵱家「Happylemon」喺澳洲同加拿大都有分店，下一步準備進駐北京同上海，「Teapresso有獨特預浸程序，可以不經人手全自動，按統一標準喺1分鐘內泡出1杯優質鮮茶，我有信心愈開愈多間分店㗎。」咁有理想？希望你得喇。
記者︰方綺君
攝影︰楊錦文
烤珍珠奶茶
標準$10 大杯$12
Franco首創，聞落似一般奶茶，飲入口有種煎到焦焦哋嘅味道，幾特別。
檸檬水晶薄荷蜜
標準$11 大杯$13
店舖賣埋果汁，呢個薄荷蜜就用新鮮檸檬榨汁，加埋薄荷入口超涼，絕對原汁原味。
芒果鮮橙優多沙冰
標準$13 大杯$15
用芒果、鮮橙、優多（即益力多）製成沙冰，夏天飲清涼解渴，味道甜甜哋幾開胃。
Happylemon（31880633）
地址：旺角登打士街43P-43S鴻輝大廈地下43SB店（近家樂商場）
