原籍馬來西亞嘅張佩金，喺97年參選亞洲小姐，獲第四名後進軍樂壇，點知04年喺上海遇上嚴重車禍。雖然𠵱家已經叫好番，不過身上留有多處傷痕，好難做番幕前。
或致不育
日前佢入稟上海市第一中級人民法院，要求肇事車輛所屬嘅中國青旅上海汽車服務公司等四名被告，賠償135萬人民幣嘅醫藥費同交通費，仲要求佢哋賠償1,000萬人民幣嘅精神損害賠償。消息指法院日前已經受理此案。
張佩金喺04年同經理人男友洪子軒（Henry）喺上海遇上交通意外，當時張佩金傷勢嚴重，折斷22條肋骨，心肺被斷骨插致嚴重內出血，恥骨碎裂，脾臟被迫切除，仲有話佢以後生唔到小朋友。張佩金日前接受內地報章訪問時話：「我至今沒法穿露臍裝，但我之前走的是性感路線。」
對於索償1,000萬呢筆高額精神損失，張佩金就話：「車禍發生之後，我的肺活量無法讓我恢復之前的清亮嗓子，有些高音甚至發不出聲，加上我還要到國外進行整容手術，清除從頸背一直延至腰部的傷痕，即使康復順利也要兩三年時間，家裏爸爸媽媽和妹妹還要我來照料。」張佩金仲話希望藉此案喚起司機對乘客生命嘅尊重喎。至於嗰間汽車服務公司已經搵咗律師處理訴訟。