要數今個暑假最叫人期待嘅荷李活猛片，一定係《加勒比海盜︰決戰魔盜王》。主角尊尼特普由當年《幻海奇緣》嘅鉸剪手，演繹到今日嘅魔盜王積克，繼續怪雞，引來唔少大人細路甘心做佢Fans。做得瘋狂Fans，新戲固然要睇，但周邊同電影有關嘅產品，更加唔可以放過，講緊嘅咪就係一眾以「魔盜王」為主題嘅跨平台遊戲。記者︰陸俊雄
市面上潮興嘅手提遊戲機，都推出咗魔盜王遊戲。PSP同NDS兩個版本，英文遊戲名《PiratesoftheCaribbean:DeadMan'sChest》都同新戲一樣，故事模式跟足電影劇情，講積克夠期交靈魂畀鬼船長DavyJones，積克要搵到死神寶箱先有救，其中仲有大戰海魔嘅情節㖭。
PSP4人海戰有驚喜
本來以為PSP版有連線功能，可以多人一齊打個痛快，點知原來係玩海上爭霸，同邊行邊打嘅故事模式，好大分別。爭霸入面，每人駕駛一艘船，主要係以發炮打低對手、玩最後生還，或爭旗仔嚟分勝負。另外每艘船都有唔同特性，如連發勁、速度快等，而且積克艘黑珍珠號都會登場，更有瞬間隱形絕技，不過要100%打爆故事模式後，先會拎到呢首勁船。唔講唔知，呢個Game係一隻UMD可供4人連線，同最近熱爆嘅炸彈人一樣，好抵玩﹗
獨有格劍模式
同朋友一齊玩係用船，自己一個玩就主要用積克。玩家沿途會怒打好多喪屍、骨頭人同食人族，有時更會出現格劍情況。呢個時候，敵人頭上會出現按鈕圖案，如交叉同正方形，電腦要你連按正方形，就要跟足指示做﹔按錯，就會俾對方攻擊，萬一死埋輸咗懲罰好大，遊戲會去返該關最頭處開始。除了格劍，亦都加入其他元素，令玩家覺得唔係用刀劍打打殺殺咁悶，例如拎支大炮炸開大門，用酒桶玩爆破，捉住繩索飛來飛去，又可執嘢掟人。其實整個遊戲唔難上手，筆者覺得好易玩㖭，就算遇到考智力過關拎藏寶圖嘅小遊戲，同打海魔，都唔係太難過版。
NDS自選角色
至於NDS版，故事模式唔似PSP只係用死積克，玩家仲可以揀維廉（奧蘭度布林）或者伊莎（姬拉麗莉）。佢哋3個人都有唔同動作同特殊技能，如積克有手槍射人、維廉放飛斧，及伊莎玩雙劍。玩家仲可以執啲武器嚟用，一個屏幕睇行動，另一個睇武器攻力，如槍有幾多發子彈等。不過有得必有失，PSP版積克會有真人發聲，雖然唔係尊尼特普本人，但聲音相當神似，而NDS版係有3個人揀，但直頭聲都無埋。對於Fans可能有啲失望，不過純想打動作遊戲嘅朋友，反而唔想成日有把聲煩住晒，淨係刀劍、爆炸聲，同配上電影原聲音樂都足夠，特別係每關音樂上NDS表現唔錯。
NDS魔盜王今次喺TouchScreen應用上，比預期中失色，睇落除咗上述用嚟睇武器情報外，只作拎吓道具同寶物之用。另外MiniGames係正常地比PSP版為多，不過筆者玩過後，覺得除咗射馬騮仔阿Jack（上集電影入面嘅猴子）比較好玩外，其他射船、射海盜等，表現一般。
《PiratesoftheCaribbean:DeadMan'sChest》
遊戲平台︰PSP、NDS、GBA
遊戲類型︰動作遊戲
遊戲人數︰1-4（PSP）、1-2（NDS）、1（GBA）
遊戲發行商︰BuenaVistaGames
行貨售價︰$280（PSP）、$240（NDS）、$190（GBA）
PS2/PC替電影解謎
PS2同PC都出咗隻魔盜王，不過同最新電影無關，而係一個介乎喺上集同今集之間嘅野史，遊戲名叫做《PiratesoftheCaribbean:TheLegendofJackSparrow》。隻遊戲係講積克同維廉喺一次任務失手被擒後，兩個人被捉上絞台時，積克開始講自己嘅故事。至於佢係咪真係騎海龜離開荒島，遊戲將為上集電影解謎。由於PC版係PS2版移植過嚟，所以玩法同畫面分別不大。要數家用版與便攜版最唔同嘅地方，就係可以多過1人打嘅故事模式；玩家可以選擇電腦拍住你去玩，呢位AI戰友仲唔使你擔心，分分鐘幫你解圍㖭。此外，玩家唔係由頭到尾用死1個角色，可以玩玩吓轉第2個。例如你揀咗積克、維廉呢對組合，想斬得過癮，可以先用維廉，斬斬吓想掟汽油彈，轉用積克又得。
PSP積克嘅動作已經好似電影入面嘅尊尼特普，家用版佢嘅動作同面容就更加神似。尊尼特普仲會以真人配音，製作認真，而維廉動作似劍客，同積克耍醉拳咁，成強烈對比。遊戲入面好多澤地、城堡、港口嘅場景，物件同地面嘅質感，做得唔錯。另外要特別留意月色，因為啲海盜同電影內容一樣，月光照到時身軀會變成骨頭，效果極佳。
《PiratesoftheCaribbean:TheLegendofJackSparrow》
遊戲平台︰PS2、PC
遊戲類型︰動作遊戲
遊戲人數︰1-2（PS2）、1-2（PC）
遊戲發行商︰BethesdaSoftworks
行貨售價︰$280（PS2）、$190（PC）