呢期新加坡好hit，煲呔去完歎肉骨茶後（美中不足係俾黃亞細員工落咗面），立法會食物及環境衞生事務委員會幾個委員都跟住去獅城，不過佢哋就無煲呔咁疏乎，可以遊山玩水，事關佢哋此行身負重任，要睇睇人哋中央屠宰場點搞法，為香港取經。
帶隊嘅肥仔明（圖）話星洲好多人信奉回教，所以屠場都安排咗兩個回教女人，喺啲雞被屠前進行儀式，然後先大開殺戒，每個鐘處理成4至5千隻雞，咪話唔勁。
肥仔明話見到啲血淋淋嘅雞掛晒喺你周圍，不時又有啲血水喺你頭上滴落嚟，都咪話唔恐怖，隨團繙譯姐姐都想嘔，就知現場幾核突。
其實佢哋都有問過當地駐經貿辦同事，黃亞細單嘢點搞㗎？點知對方耍手擰頭話唔好提，好明顯大家都真係唔想再提呢件超級瘀事。