陳奕迅（Eason）前晚擔任軟硬天師演唱會表演嘉賓，開場前他先到停車場搓波熱身，待正式演出時即變得龍精虎猛，連唱多首金曲，還主動安哥，又落台與fans握手親面頰，儼如個人騷。獻唱期間，大會特別為他製造飄雪效果，葛民輝見狀打趣道：「我唱嘅時候點解冇㗎？」
軟硬天師前晚請來陳奕迅擔任演唱會表演嘉賓，商台老闆何佐芝及何驥父子、前廣播處處長張敏儀等也有捧場，圈中人則包括鄭希怡、組合Soler及陳淑蘭等。開場前，Eason在停車場踢波，玩得十分高興，甫上台已情緒高漲，獻唱《聽聽》時更落台與觀眾握手，又主動親吻女歌迷面頰，眾歌迷見狀即𠵱嘩鬼叫。
嘲阿葛跳影子舞
林海峰（Jan）在台上大讚Eason熱愛音樂又會保護家人，是真正的男子漢，之後話題一轉說：「恭喜你今年年頭開9場演唱會，不過我哋開10場囉。」阿葛搭嘴道：「Ifeelsobad。」
阿Jan續說：「江湖傳聞你開騷嗰日肚屙，入醫院吊鹽水，五點先去到紅館，真係好嘢，唔舒服都上台，即係揸流攤（欺場）啦！咁扣1場，即係開8場，我哋多你兩場喇。」
現場所見Eason聞言只管儍笑，毫無還擊之力，阿Jan見狀惟有打圓場道：「不過我哋開咗幾場，又甩嘴又唱錯歌詞，阿葛仲跳影子舞，扣扣埋埋算開得一場，你都係贏。」
三人合唱廣告歌
之後三人合唱《請勿客氣》，又將《夕陽無限好》改成麥當勞廣告歌詞，最後Eason唱完《夕陽無限好》後竟不願落台，要求再唱《浮誇》，現場還有飄雪效果，猶如個人騷一樣，軟硬則坐在台邊欣賞，阿葛還笑說：「我唱嘅時候點解冇飄雪㗎？」
此外，前晚軟硬一開場便落台與觀眾握手，阿葛和鄭希怡握手後幾乎失足跣倒，之後他走過台上一條小斜路時又失重心跣低，幸好無大礙。
採訪、攝影：胡比
