股壇長毛DavidWebb寫咗十三頁評論，大彈海域集團之不尋常事件。長毛做得好仔細，由一九九七年嘅海域年報睇起，旁及歷來發出嘅通告，海域啲異動，亦一一難逃長毛法眼。如果呢篇報告喺六月發表，就功德無量咯，可惜𠵱家寫出來，既係明日黃花，亦係事後孔明。
財務伍睇完全文，打電話嚟講：「點解香港股壇冇一位唐人長毛，只有政壇長毛？鬼仔Webb得罪人唔使本，對事不對人，你話唐人可唔可以咁樣做呢？」一時之間，大家默然無語。唯有老套啲引用陶傑一句：中國人DNA與西人不同。做DavidWebb，要有幾個條件：（一）財政獨立、唔使靠份糧睇老細面色。（二）文字了得。（三）對財經分析有深厚認識。（四）熟悉股市運作機制。（五）性格獨立敢言，得罪人冇有怕。（六）有科技平台（網站），唔使靠其他媒體（要倚賴其他媒體就多一層制約）。邊位唐人分析師有齊呢幾項條件，不妨等做DavidWebb。
財務伍對海域啲獨立非執董以「私人理由」辭職，有啲感慨，最近有人搵佢做上市公司獨立非執董，兼埋做董事會嘅審核委員會（AuditCommittee）主席，以佢嘅經驗，專業資格，當然勝任有餘，但係該上市公司主席只願畀五萬銀做董事袍金，財務伍就嗤之以鼻：「五萬銀對我完全冇吸引力，咁嘞你哋一年付出『內部稽核』（internalaudit）費用超過一百萬，畀我五十萬一年，我唔會計較。」上市公司主席唔肯，就此拉倒。
五萬銀搵一個外人做獨立非執董兼審核委員會主席，簡直係剝削，你估同主席有親咩。有親嘅話，就唔應該做獨立非執董啦。目前香港嘅公司管治制度，規定每一上市公司最少要有三名獨立非執行董事，有咁多上市公司，邊度有足夠嘅富於經驗兼且真正獨立嘅人士肯為幾萬銀而做獨立非執董吖！就算做咗，都唔會真正做事，只會大難臨頭各自飛，有事就跳船，以私人理由辭職。