傳統Chopper（中文譯作：劈人者）又重又大架，好似「哈利」咁，車主身形矮少少，無番幾嚿肌肉都咪使旨意襯得起，所以好多「Chopper人」，情願揀啲縮水Chopper，貪佢細架得嚟又好睇。Kawasaki近排出咗部VN900，雖然只得903c.c.，但有晒VN2000嘅氣勢，最抵死係好似細車咁易操控，加速、低扭表現拍得住大車，啱晒想轉玩Chopper嘅入門弟子。
記者：黃婉冰
攝影：陳陶鈞 Model：Ruby
VN2000瘦身版 入門最啱玩
唔係講笑，如果唔係睇見盞頭燈同個風鼓唔同咗，離遠睇真係以為佢係VN2000，唔怪得之有人話佢係VN200嘅縮水版，呢點我都同意。雖然車有相似，但其實佢內在所有基因同「老大」完全唔同，首先，其引擎排氣量只得903c.c.，但唔好睇小佢，雖然同大車差成倍有多，但講到「力氣」一樣有，尤其是當處於0-80km/h時，你就可以完全感受到其強勁嘅低扭表現，唔遜色於大車，加上引擎有自動轉速感應，一感應到車出現怠速過低時，就會自動作出調校。除此之外，新車仲有唔少改動，好似改用電子燃油噴注系統，車仔細細，發起火嚟唔係「車」咁品，傳動又改咗行皮帶，襟用啲又易打理，計落年中都慳唔少。
重量級外形 輕量級操控
成日覺得中國人要揀Chopper有啲難度，揀500、750又好似差少少威勢，一下子跳到去1100、2000嘅重量級呢？太大，好難操控，所以VN900可以話係介乎於兩者之間嘅BestChoice，雖然佢望落好似都好「大份」，但查實要「搞掂」佢一啲都唔難，因為新車喺設計上改善咗唔少，好似個頭擔，就算處於慢速時都唔會有自動傾側內摺嘅情形出現，後輪胎又改用170闊胎，加上1,645mm長軸距、重心低嘅設計，無論在任何路面甚至入彎都唔使驚兩頭飄，揸上手後你會發覺感覺輕鬆易操控，完全同佢個「大嚿」外形唔合襯，所以話佢係入門車級之選，一啲都無錯。
賣相加足料 型足成條街
之前話過佢似VN2000，但其實再睇真啲，你會發覺佢個賣相原來比前者有風格，新車用咗唔少電鍍裝飾，好似風鼓、油缸、沙板、錶板，襯埋個大圓頭燈，感覺唔會太過誇張，但又可以畀到你Chopper嗰種「英偉」嘅氣勢，所以出到街都有高收視，特別係女仔，個個都會望多兩眼！
KawasakiVN900ClassicSpecifications
引擎：4衝程水冷V-twin雙氣缸SOHC
馬力：54ps/6,000rpm
扭力：8.4kgm/3,500rpm
傳動：濕式多片5前速
車價：＄72,000
車輛提供：泰力摩托車中心（25122228）
