立法會前廳噚日無端端傳嚟一陣歡呼歌聲，一班人竟然喺度唱生日歌，原來唔知邊位有心人，為8月壽星仔包括黃容根、李國麟同金勞詹買咗個蛋糕，可惜金勞詹唔知行咗去邊，冇得一齊吹蠟燭。但李國麟話唔想再喺立法會慶祝喎，事關8月明明應該休咗會，仲留喺度慶祝生日：「即係證明冇假放囉！」
張宇人不愧為立法會飲食界代表，噚日特登買咗好多盒蛋撻畀班議員同記者食，計埋都三、四十件。張宇人見到成枱蛋撻，點解都唔食番件？佢話之前食咗一件之後，即刻肥咗四磅。梗係啦，佢𠵱家已經有個大肚腩，仲點敢再食。至於呢個「特別大食會」，會持續到星期六開完截聽會議為止。睇怕班記者三日後，應該個個都會肥十磅。