做小股東一定要識睇數，唔好淨信新聞同公關說話，更加唔好信消息，否則輸死未天光。
今日嚟一個示範。名牌潘旗下間廸生創建，年報剛剛發出，董事薪酬一目了然。其中潘廸生自己收1045.9萬，比較起上一年加咗6.57%，全部董事加埋合共收取3475.2萬元，升8.28%。
單睇呢啲薪酬同升幅意義唔大，要睇埋其他。廸生創建去年做26.4億生意，升6.8%。盈利2.09億元，僅升2.6%。以盈利同董事酬金相比，董事對自己幾慷慨，不過，間公司去年派畀小股東嘅股息，都多咗5.6%。所以，管理層都唔係太自私，算係咁啦。當然如果股價上得番年初12蚊，小股東就會更開心。