我諗大家都知，孫柏文對互聯網有無比嘅信心，相信佢總有一日可以摧毀傳統電訊同傳媒。不過，唔係話因為有互聯網嘅出現，就會令所有人即刻唔搵愛人講電話、唔睇電視節目劇集、唔睇新聞報道或者唔聽最新勁歌金曲。
摧毀「傳統」電訊同傳媒嘅意思係，互聯網出現之下，一個人如果要做上述嘅行動，需要畀嘅錢就會愈來愈少，甚至唔使畀。當收入唔可以再靠以前嗰套，就惟有變，變咗之後就唔再係「傳統」傳媒同電訊囉！
呢個現象最經典嘅例子，就一定係打長途電話。以前打長途電話，貴到飛起，之後多幾夥人競爭，價錢平啲；外國又多咗競爭，價錢再平啲，結果鬥平鬥殘之後，甚至出現Skype，可以畀用戶免費打長途電話。呢啲絕對係好嘅發展，有競爭先有進步。當時處於壟斷地位嘅電訊商危言聳聽話呢話路，結果又咪係乜事都冇！所以孫柏文對互聯網摧毀「傳統」電訊同傳媒嘅立場係︰不要怕，只要信！
藝高膽大者用公仔紙對換
話說回頭，呢的傳統傳媒同電訊一旦見勢色唔對，通常都會有人意興闌珊，寧願要錢唔要貨。不過既然呢啲公司收入水退船低，一個唔好彩分分鐘冇收入，又邊有人肯會用真金白銀收購？盡其量都只會有啲藝高人膽大者，肯用公仔紙換公仔紙，又或者加多少現金做甜頭。
要有辦法做到人棄我取，又可以兵不血刃，其實一啲都唔簡單。通常呢啲能人所不能者，如果唔係有全盤包裝改頭換面，就係心繫家國，要為民族大業出一分力，又或者兩個概念共冶一爐，除此之外，我孫柏文真係諗唔到有第四個理由。
呢招財技加政治crossover唔係人人得，響香港最巴閉者莫過於當年李澤楷先夾高德信佳，再將德信佳變身盈動，然後用數碼港做踏板，氣勢如虹之際一啖食咗香港電訊。其他嘢已經係歷史，我都無謂多講，費事又勾起大家啲傷心事。
李澤楷成了M&A中之M&A？
今時今日唔知係唔係有人想嚟個翻版，萬佳訊（8279）以每股$0.055配售48290889股，集資270萬唔到，衰啲講句，連買個將軍澳豪宅都唔夠。話說呢間蚊型公司股價一復牌升咗18.3倍，十足十當年德信佳翻版。
不過話時話，自從上個禮拜傳出邵爵士入院，就有人話洽購邵氏（80）。不過明眼人一睇就知，醉翁之意不在酒，在乎TVB（511）也。不過511股價冇乜郁，又十足十早輪電盈賣盤，唔通真係連賣家都抄足李澤楷嗰套？
莫非李澤楷已經變成了M&A中嘅M&A（ModelAnswer）？
孫柏文