影音試團：PENTAX單鏡夜景王　超吸感光唔怕手震

影夜景一向既考攝影師功夫、對相機要求亦好高，對攝影好有興趣嘅靚女Zoe，就投訴自己部DC影夜景麻麻。剛好PENTAX新出咗部K100D，擁有單鏡DC高階操作同質素之餘，亦具少見嘅ISO3200高感光度，唔單只影夜景一流，連日常都因此可提高快門速度，手震都減低埋，女仔都Pro得起！

記者：許福合
攝影：陳盛臣
ImageGirl：Zoe

單鏡DC少有高ISO

K100D作為一部入門級單鏡DC，定價已經非常有吸引力，標準套裝跟支DA18-55mm/F3.5-5.8AL鏡頭，只要$5,999，另外仲有個雙鏡套裝，加多支DA50-200mm/F4-5.6ED鏡，$7,490就交易，咁就闊景影得，遠景亦照顧得到！
之所以話K100D影夜景一流，皆因佢備有同價位少見嘅ISO3200，以一萬元樓下單鏡DC中，可以話絕無僅有！高ISO3200有咩好？一般相機影夜景要「吸」夠光，都要將快門調低遷就，呢個時候就要出動到腳架先可拍到穩定相片，都幾麻煩。而K100D最高可將ISO調高至3200（一般單鏡DC只有ISO1600），大大提高相機吸光能力，好多時可將快門保持於手持範圍內拍攝。
試機當日，由尖沙嘴影過對面海，快門仍可保持於1/30秒左右拍攝，對Zoe嚟講影夜景相實在簡單方便得多。不過提高ISO同時亦有後遺症，出嚟相片微粒會較粗，不夠幼滑，筆者就覺得K100D拍出的相片，幼滑度大約係一般相機ISO800到1600左右，整體上都可接受。

■K100D係單鏡反光DC，主要對應PENTAX自家鏡頭。

■機頂傳統黑白芒顯示器，不過奇怪係無夜光功能。

■雙鏡套裝會加多支DA50-200mm/F4-5.6ED鏡，影遠景一流。

■閃燈設於高位，唔怕被鏡頭遮住。

芒靚到有啲假

除咗ISO夠高適合夜景之餘，個芒都有唔少驚喜規格，除咗單鏡DC中仍少有嘅2.5"大芒外，所顯示出嚟嘅顏色亦相當飽滿，鮮艷程度可達誇張級數，雖然白天拍攝就唔多覺，不過用來拍攝夜景，尤其選用ISO3200拍攝時，出來效果真係好似「畫」咁靚，不過相片傳回電腦上睇，差異就無咁大，證明俾個芒「呃」咗！
另外防震已係不可缺少功能，K100D使用PENTAX自家研發技術，利用磁力令CCD抵銷震動影響，再加上軟件對影像作最後修正，自然比一般機仔所謂防震「堅」好多！實際試用時，1/15秒快門都可以輕鬆單手影，而1/8秒慢快門就要睇閣下嘅手夠唔夠定喇。

■防震功能可作獨立開關，想原汁原味可關掉，不過一般人求穩陣都會長開。

■機背2.5"LCD，顯示藍、紅等色系特別鮮色。

■可檢查相片拍攝紀錄，有齊光圈快門等數值，資料非常詳細。

機輕手感佳

睇K100D機身Size，其實同好多Prosumer級長鏡DC差唔多，相對於好多單鏡DC，更係細咗一個碼有多！雖然機身用料夠晒實淨，不過拎上手略為感覺輕飄飄，全機仲要只有560g，用慣重型單鏡DC可能有啲唔習慣，好在細碼版機身仍保留一個好揸手柄，保持良好手感，女士們亦唔會覺得太大部。
記憶卡仍然係同系列相機最愛嘅SD卡，現時SD卡價位跌咗唔少，512MB都唔使一嚿水，買張大容量SD卡，有需要時開RAW來影都唔使就住就住！電源亦係筆者至愛嘅AA電芯，替換比較方便同有彈性。