兩消費者分別向本報投訴，他們購買兩個牌子的名貴手錶，可是手錶經常自動停止運行，令他們極為不便。經本報跟進投訴，消費者終獲得換錶及退款。
個案一：
任室內設計的梁先生不滿地說：「我都戴過幾隻牌子嘅自動錶，戴住喺手就會自動上鏈行。5月時我想換錶，見IWC係十大名錶之一，諗住品質有保證，就用一萬八千幾蚊，買咗一隻。」
梁先生指，該隻聲稱可持續運行42小時的手錶，名實不副。「我每日起碼戴14個鐘，點知兩個禮拜後，朝早瞓醒就見隻錶停咗，攞番總代理整，師傅就話有啲螺絲鬆咗同潤滑油唔夠；但整完15日又試唔識郁。」
本報轉介獲更換
名錶反覆停頓，令梁先生信心大失。他說：「就算唔好彩，我隻錶有事，無理由整完咁快又壞過！明顯係產品嘅維修或質素都有問題，我要求退番錢畀我，但用電郵投訴過幾次，佢哋都冇正面答覆我，淨係叫我再整！」
IWC萬國錶亞太區發言人回覆，梁先生的自動上鏈腕錶，最長可運行42小時。「手錶動力維持時間嘅長短，視乎手部郁動幅度，一般戴住十幾個鐘，可以行一日或日半。如果梁先生隻錶有問題，我哋會提供免費維修，但要退錢，客戶必須同佢買錶嘅店舖聯絡，作為代理，我哋控制唔到。」
本報轉介此個案後，梁先生終與IWC達成協議，更換另一全新同款手錶。
檔案編號：0713034
個案二：
蕭先生向本報投訴稱，他於去年11月初到將軍澳一家珠寶錶行，購買一隻帝舵（TUDOR）品牌男裝手錶，價值接近一萬元，可是手錶經常出現問題，令他一肚子氣。
蕭先生稱，這類自動手錶，只每一天正常使用，隨着手部擺動，手錶會自己行走，毋須每天上鏈，帝舵廠方職員亦曾告訴他，只要客戶每天佩戴手錶8至10個小時，手錶便會自己運行超過30小時，可是他使用不久，已發現情況並非如此。
「我買咗隻錶一個星期，有一次戴咗成日，夜晚8點除低隻錶，點知第二朝發現，隻錶朝早7點已經停咗；再隔一星期，呢種情況又再發生，我覺得係手錶機件有問題，就將隻錶送去維修中心整，12月初攞番，點知隔一個禮拜，隻錶又自己停，根本冇改善到。」
本報跟進終退款
蕭先生再將手錶送回維修中心，錶廠為其手錶更換零件。他取表再戴，可是用不了幾天，手錶又再次自行停頓。蕭先生甚不滿，因就此事已平白浪費他不少時間，在幾經爭取下，終獲更換一隻同款新錶，他還以為問題已解決。
可是蕭先生稱，新手錶竟然與之前一隻一樣，經常戴上後，放下一晚早上便自行停頓，實令他不勝其煩，他再三投訴，再次獲有關方面答應換錶，可是再換一隻後，相同情況依然出現。
「真係好唔明，點解換極都係咁，我已經對隻錶無晒信心，唔想再戴，我只係要求佢退番錢畀我。」
本報將上述投訴轉介帝舵錶代理跟進。蕭先生其後向本報表示，他早前接獲通知，可以攜同手錶返回錶行，取回手錶全數貨款。
檔案編號：0727006
