湯家驊同老婆囝囝一齊去咗三藩市同夏威夷，玩咗成十幾日先返，前日急急趕返香港，因為囝囝大學聯招（JUPAS）放榜。
湯大狀噚朝一早就同囝囝等派位消息，結果港大法律系唔收佢。湯大狀話因為有個成績稍遜嘅同學都入到，搞到囝囝非常失望，惟有成朝開解佢，晏晝先匆匆趕返立法會，無端端俾黃應士話佢遲到。
湯大狀同八方講，個仔唔單止想做律師，仲想做大律師，所以決定等埋8月中英國聯招放榜，然後去英國讀法律。佢好樂觀咁話：「英國咁多間大學，一定有間收佢。」
湯大狀梗係想阿仔去英國啦，因為1972年佢喺港大讀法律，攞咗一級榮譽同全班第一名；之後去咗牛津，攞埋倫敦大律師公會終期試榮譽證書，又係一級榮譽同總第一名（好耐冇人攞到），殺低晒班鬼仔，真係犀利，李柱銘都係二級榮譽咋！牛津仲頒咗個獎學金畀佢。
正所謂有其父必有其子，湯大狀囝囝只要加倍努力，一定青出於藍嘅！