細細個成日發夢可以擁有1架全球獨一無二，為我設計嘅超級跑車，估唔到廿幾年後嘅今日，真係有人可以夢想成真。呢位幸運車迷叫JamesGlickenhaus，係位60年代賽車收藏家，佢搵咗PininfarinaS.p.A個總裁兼主席Pininfarina幫佢度身訂做設計咗架新法拉利─—-FerrariP4/5，由外形設計到引擎、製造全由主席一手包辦，都咪話唔巴閉。
外形根據空氣動力學設計
話明係度身訂做，新車外形當然與別不同，P4/5個雛型係根據CAS為藍圖，然後再由Pininfarina設計同製造，淨係為呢架車而設嘅配件就已經超過200件，為咗可以令新車嘅風阻系數減到最低，廠方特別用咗碳纖做全架車嘅車殼，再用圓又尖嘅車身設計，裝埋個全透明車頂連玻璃，成架充滿劃時代設計嘅超級跑車就咁整咗出嚟，呢架車將會喺PebbleBeach亮相，有機會我都想一睹其真面目。
記者：黃婉冰