陳四萬喺FCC發表咗佢將會畢生論政宣言後就匆匆離開咗香港，原來呢位Grandma真係二十四孝，人哋就陪仔女讀書，佢就陪孫去英國入夏令營，佢閨中密友話，阿太月底先會返港，大家有排都唔會喺公開場合度見到佢。
咁個研究香港政制何去何從嘅核心小組（CoreGroup）怎麼辦？睇嚟佢一係要喺倫敦遙控，一係就要遲一步先開工。八方問啱啱喺安徽考察完回港嘅全國人大代表李鵬飛，陳太有冇搵佢？佢話冇，因為大家都忙，至於有消息話陳太搵過詹德隆，不過被詹兄拒絕，阿飛都話略有所聞，但係無從證實。
誰是詹德隆？咪當年曾經講過如果大亞灣起好核電站，佢第一個會移民嘅詹先生。詹德隆言而有信，之後真係離開過香港，後來回流。詹德隆68年港大英國文學系畢業，係陳太師弟，曾經留學英國，修讀政治，72年加入BBC，76年回港，做過TVB、中大、香港總商會、新鴻基證券集團，𠵱家開咗間顧問公司自任總裁。詹德隆中英文都好了得，寫得又講得，梗係值得邀請入小組喇。
李麗娟拒做發言人
陳太人脈甚廣，到時爆出嚟嘅人名可能大家都會有驚喜，飛哥就叫大家唔好心急，等佢喺英國靜靜地諗吓。依佢嘅睇法，陳太搞個核心小組，係為佢唔參選特首鋪路，因為係人都知呢場所謂選舉煲呔一定勝出，即係其他人輸梗，陳太唔會打必敗之仗，所以為咗以後有個平台發表意見，而且集思廣益，成立個十人核心小組係上上之策。
「陳太唔會貿貿然做嘢。」咁又係，佢阿太退休之後，一直好低調，要搵佢講嘢都幾難，但係自從舊年上街後，一切都改變晒，陳太主動出擊，屢發屢中，搞到煲呔同肥龍手忙腳亂，早前煲呔接受亞視專訪，問到陳太參選，佢即時眼眨眨咗成分鐘，先至識得回應。
陳太出山，令好多人跌眼鏡，亦令好多人十分雀躍，因為民主派始終係群龍無首。至於上次「宣布」陳太唔參選嘅眾人契媽李麗娟，就話佢絕對冇諗過當阿太嘅發言人，不過，當日在演藝學院佢獲院士時，有人有心撩事鬥非，話陳太出嚟搞亂檔，契媽忍唔住至回應咗一句，為陳太澄清一吓，因為佢知陳太唔係咁嘅人。至於陳太下一步會點行，佢都話冇人知道。