行政長官曾蔭權為藍天打氣，打算積極改善香港空氣質素。「夏日輕裝」其實只適用於一些本身有型有款兼有氣質人士，某些土佬高官及議員，基本上靠晒套西裝，要佢哋自己襯套夏日輕裝，多數變成似揸小巴多過似返中環工。「停車須熄匙」係應該嘅，尤其係大旅遊巴士排隊等客、小巴埋站、貴族學校門口私家車等接皇帝仔女放學，置身呢啲車隊附近，簡直係廢氣桑拿。不過唔知曾先生有冇行過尖東富豪酒店附近的後巷、銅鑼灣惠康超市外的行人路、黃埔花園大船對面的平台，彌漫着酒樓食肆的油煙熱氣對準行人攻過來，只係行半個街口，身上瞬即一陣油煙除，非常討厭。
政府應鼓勵有興趣換車人士購買汽油與電混合動力的Hybrid環保汽車，此車在北美洲非常受歡迎，能大幅降低汽車廢氣排放量。政府在市區再賣地時，請嚴厲執行樓宇高度及寬度限制，九龍塘的歌和老街，以往可以見到一大片天，但現時只見漫天樓盤，空氣肯定不流通。跑馬地的禮頓山也像一大片神主牌一樣困住整個區域，快活谷本來不是谷，但被這人做屏障一擋，當堂變成不快活谷。
曾先生更提議市民避免使用含揮發性有機化合物的噴髮膠，此舉可能另有深意，試問陳太個髮型若然唔噴噴髮膠又點得咁挺咁有氣勢，唔用噴髮膠即係叫陳太唔好上街啫，收唔收到？