鴨脷洲海怡半島7月份成交突飛猛進，無論買賣定租務都超越上個月，美聯林潤強話，7月中打後暑假開始，成交一單接一單，埋數有40宗買賣同62宗租務，升幅分別達三成幾同兩成，真係誇張。
海怡半島7月份有咁多成交，同班莘莘學子都好有關係，皆因唔少家長趁暑假睇樓買樓，方便仔女開學前入住，同期多個大型屋苑買賣都多咗，唔單止海怡半島。
近國際學校環境舒服
至於租務都咁旺，原因就特別啲嘞，近排班租客唔少係嚟自屋苑附近幾間國際學校新請嘅外籍教師，佢哋睇中海怡近學校、環境舒服，月租1萬蚊就租到600幾呎兩房單位。
自從第一個外籍老師租咗之後，接連有其他同類問盤，單係7月份就有9個單位由外籍教師租住，佔成個月租務總成交15%。
呢班外籍老師主要揀600幾呎嘅單位，例如1座高層E室，640呎，就以月租9600蚊租咗，呎租15蚊。林潤強話600幾呎單位咁好租，租金喺短短1個月就搶高咗，6月份仲可以用8500蚊租到，𠵱家無9000蚊都唔使諗。