大家仲記得梁寶榮否？呢位特區首任駐京辦主任，04年已經55歲可以退休，奈何冇人肯上京，令佢搵真銀嘅大計一拖再拖。昨日，終於塵埃落定，殼王陳國強做老細嗰間保華集團，宣布委任梁寶榮做獨立非執行董事。呢個消息在圈中一早已傳到通街都知，唔算係秘密。呢個位，每年酬金總共32萬。
講起保華集團，佢位主席係周明權，即係周梁淑怡位夫君，佢之前做建築，亦係政府中人，現在多數時間在大陸，幫保華睇住啲港口碼頭。但聽熟知內情者講，間公司實際話得事嘅並唔係主席，而係副主席兼董事總經理劉高原。
除咗梁寶榮之外，佢哋重斟緊另一位大家熟悉嘅猛人加盟，遲吓同大家報告。