因工作關係認識模特兒Lilian，佢樣靚身材正，說話斯文大方，喺Cafe做兼職，不得了囉，咁靚女仲唔日日俾男仔撩？「係啩，好多男仔叫我詳細介紹餐牌，乘機同我傾多幾句咁囉。」咁咋？總有男仔攞電話號碼啩？「有！仲差唔多日日有男仔問我攞電話㖭，不過我唔會畀私人電話號碼佢哋㗎，叫佢哋打電話嚟Cafe搵我囉，亦有男仔試過問我攞ICQ或者MSN，我都唔會畀。如果客人話想約我，咪叫佢上嚟舖頭食嘢囉！」其實唔止男仔，我係女仔都好鍾意Lilian，每次同佢吹水，發覺佢笑得好溫柔，聽到佢把可愛嘅聲音都好冧吓。
Lilian：「做Model賺快錢但工作量好唔穩定，可以長時間無Job。做Cafe雖然只係幾十蚊一個鐘，但收入穩定兼少啲時間行街，儲多好多錢㗎。」記得去年年尾同佢影相，見佢手指包晒膠布，原來洗碗時割傷，個傷口仲好深。嗱，有辦畀嗰亭腦勺都未生埋嘅所謂Model睇呀，唔辛苦點得世間財？以為肯影Sexy相就叫Model？你索得過Lilian咩？Lilian都要腳踏實地做嘢喇。Lilian：「幾年前喺外國讀完書返香港就開始做兼職，順便搵嘢學，學完瑜伽就學化妝，𠵱家間中會接化妝Job，Model、化妝同Cafe兼職同時進行。」想識佢？去「LollCafe」趁吓啦，不過佢做兼職，見唔見到佢靠撞彩喇。記者：黃若茵 攝影：譚盈傑
迷你多士$42
細細件多士可以一啖放入口，底層係烘過嘅麵包，上面放青瓜、鮮茄醬同大蝦，麵包微暖青瓜清涼，一次過感受到雙重口感。
蒜味火柴$32
一條條脆口麵包條砌成井字形，可選擇鮮茄醬、蜜糖乳酪醬、南瓜醬等，我就最鍾意蜜糖乳酪醬喇！
Cozy$40
Lilian：「呢個飲品最受女仔歡迎，柚子同青檸汁酸酸哋，溝雜莓同雪碧多咗甜味，好啱Keep緊Fit嘅女仔飲，我自己都好鍾意飲㗎！」
Lilian（右）入行近4年，為Freelance模特兒，拍過Aeon信用卡、肯德雞等廣告，亦曾參與拍攝Kelly《最佳位置》、吳浩康《棋王》及關智斌《先知》（TVB版）等MTV。
Cafe內放置不少本地品牌的Tee，Lilian間中做埋Sales工作，Tee每件約$300。
食客都讚靚！
Loll（28389060）
地址：銅鑼灣景隆街1號1樓