滙控（005）張成績表，叫好唔叫座，未能跟貼英美市場個價，收139.90元，微跌0.20元，拖低恒指7點，中移動（941）唔見0.75元令恒指冇咗46點。
滙控10個交易日後除息，過幾日可能有收息客買貨推高股價，趁低位揸C輪，揀啲稍遠期嘅，例如昨日所提嘅9043。
建行C輪4578：建行（939）收3.38元，跌2仙。建行喺3.40元上下移動，差不多有3個禮拜，吼再跌多幾個位，買C輪博反彈，揀熱門貨色4578埋手。隻輪11月初夠鐘，輪價18.8仙，溢價5.8%，槓桿率18倍（有效9.8倍），引伸波幅26.4%。
建行暫時係波幅唔大嘅股份，炒C輪切忌坐盤坐得耐，否則輸溢價可以輸到嗌救命。建行有幾隻10月份夠鐘嘅仙輪，溢價15%甚至20%，買呢啲輪，裝修唔使買牆紙。
地鐵C輪9044：地鐵（066）近排威猛，昨跌0.20元，收19.68元，吼住再調整多啲，買C輪9044。隻輪12月初到期，輪價21.5仙，溢價3.8%，槓桿率9.2倍（有效6.5倍），引伸波幅29.3%，呢隻係最熱門嘅地鐵C輪。9433數據更靚，但交投太少，昨日只有3萬金額成交。
太AC輪3517：太A（019）收80.60元，跌0.10元。喺太A回到80元齊頭，買C輪3517。隻輪9月尾夠鐘，輪價45仙，溢價1.7%，槓桿率17.9倍（有效12.1倍），引伸波幅22.3%。想穩陣啲，唔想贏輸咁大，揀2170。
章盛