早兩年喺GBA上大獲好評嘅新派遊戲《我們的太陽》，單單依靠真實中嘅太陽光，先可消滅敵人呢點，已經創意爆燈，當年筆者為呢款遊戲做過介紹，測試過真係要天然太陽光先可為武器「叉電」，夜晚想煲Game都唔得！
記者：徐影龍
畫劍、吹氣乜都齊
製作公司為開發《MetalGear》嘅小島製作室，闊別兩年終於有續篇《我們的太陽DS》消息。顧名思義，今集以NDS作平台，透過雙芒同觸屏設計，肯定有更多新搞作！遊戲最大變更係取消光度感應器，代之係以NDS上芒扮太陽同月亮，相信會依靠機內時鐘作日夜轉換。兩名主角分別以日光同月光為武器叉電，即係今集喺夜晚都可煲機啦！
至於其他獨特玩法，有透過輕觸屏幕及咪高峯，作唔同種類嘅攻擊，如用筆畫出劍氣攻擊，又或用口猛吹咪高峯，不斷吹倒敵人等，玩法上比GBA版更為豐富多變。《我們的太陽DS》預定年尾先推出，而官方網頁將喺9月22日正式開放，到時可睇到更多有趣點子。
臨時網址：www.konami.jp/kojima_pro/japanese/lineup/boktai_ds_00.html