若果大家以為年屆58、退咗休嘅電盈前副主席張永霖（Linus），已經冇晒市場嘅話，咁就大錯特錯，噚日適逢大學聯招放榜，佢出席港大SPACE嘅活動，負責做主講，唔止吸引台下近百家長同學生捧場，仲有個忠心嘅媽咪級「粉絲」，當眾大讚佢係「另類師奶殺手」，𠱁得Linus鬼咁開心，仲即場自爆身世及瘀事，話要勉勵吓班年輕人。
張永霖話，佢阿爺喺70年過身，佢雖然係長子嫡孫，但就一毫子身家都分唔到，當時好有挫敗感，不過家吓諗番轉頭，就覺得好彩，事關嗰時佢有個錢嘅話，第一時間就會走去買架靚車，做「少女殺手」，又點會咁勤力做嘢，發憤向上吖！所以佢話，做人千祈咪咁計較，否則好多時都會得不償失。
後悔冇讀理科
咪睇張永霖平日文質彬彬，原來佢讀中學嗰陣，每年都有俾人打籐，但佢唔單止冇怪老師，仲覺得適當嘅體罰，可以令到學生乖啲，佢自己就係樣辦。而佢咁多年嚟，最後悔嘅就係中學嗰時，冇讀到理科，搞到佢每次同化學好叻嘅廖秀冬局長傾偈，都插唔到嘴，否則，分分鐘連冬姨都kill埋。
李華華
讀者如有任何意見或報料，歡迎發送電郵至[email protected]。