中國水務噚日開記者會介紹年度業績，由於核心嘅供水業務剛開始營運，期內為集團帶嚟最多盈利貢獻嘅，反而係一項十分罕有嘅業務－－高原聖果沙棘（圖）。
呢種果實可以喺高原5000米，亁燥缺水嘅大西北地方種植，國家主席胡錦濤同總理溫家寶都曾鼓吹喺呢啲荒蕪地方種植沙棘，因為可控制水土流失，改善生態環境，亦為當地農民開一條搵食途徑。
中國水務主席段傳良介紹，呢種果實雖然生存喺咁惡劣嘅環境，但佢嘅保健同藥用功能都好大，例如可以防曬，含有大量維他命等，集團用咗2000多萬元投資收購，半年已獲利1600多萬元，業務遍及國內10多個省分，涉及面積數百萬畝地，為數十萬農民提供生計。