唔係第一次見酒樓推出$1雞，好多時係就係收你$1，不過隻雞小兒麻痹又細又無肉，拎到上枱條氣勁唔順，好似俾人搵笨咁。有晚消夜經過牛頭角，見到有酒家又賣$1雞，貪小便宜嘅我決定博多次，好彩，我博中咗，真係無呃人，雞夠大隻兼味道一流，望埋消夜菜單，除咗$1雞，好多小炒都只係$18.8，食晒以下推介嘅7碟餸，$200唔使捧住個肚落樓（包埋茶芥每位$8、花生每枱$8、加一），一家四口嚟到又使乜爭食吖！
記者：黃若茵 攝影：陳盛臣
模特兒：Yoyo、Ryan、Sandy（Salvador）
海鮮小炒啱街坊
開業兩個月嘅「雍雅」，由有廿幾年做中菜經驗嘅總廚黃師傅坐鎮，師傅做過廣州花園酒店同叙福樓總廚，做鮑參翅肚呢亭貴價嘢絕對唔成問題，嚟到牛頭角區初頭都諗住行高檔路線，但經過一輪實地考察後發覺唔Work，「呢區屋邨多，巡過區發覺所有食肆都係走大眾化路線，無一間酒樓主打鮑翅貴價嘢，所以都係決定穩穩陣陣做海鮮小炒，起碼街坊個個啱食吖嘛！」做海鮮小炒梗穩陣，不過質素唔可以求其噃，「我設計菜單時都盡量揀番啲時令食物，譬如呢排天氣熱，會揀番啲唔膩口又清爽開胃嘅食材喇！」
無話將價就貨
新舖開張梗要諗多啲花臣吸引客人，老闆落指令以平價吸引客人，總廚黃師傅即刻諗計：「老闆話要以抵食價益街坊，不過我又唔想拉低食物質素，好彩老闆又畀我話晒事，諗諗吓既然要抵，索性做$1雞。雖然只賣$1，但成隻雞上，而且工序做到足，一啲都唔馬虎㗎。」一隻雞成本幾多大家心照，斷估最平都要每隻$30，𠵱家賣$1，仲未計醃料成本，嗰$29蝕梗，師傅話：「食物質素好就一定會有回頭客，呢段時間我哋新開張，惟有用低價吸引客人，只要啲嘢好食，將來做番正價客人都一定會返轉頭幫襯。」將來嘅事將來至算，我份人就好短視，𠵱家賣得平，咪食多幾餐囉。
鹽甑三杯一桶雞$1
師傅：「我改良傳統三杯雞，用紹酒、米酒同玫瑰露3種酒醃雞，醃到入晒味再鹽焗，酒味香得嚟又唔會難入口，小朋友食咗都唔會醉㗎。」
家鄉柚子生菜包$18.8
份量十足，丁香跟蝦米炒得極香，加入酸甜柚子更加開胃，用生菜包住食，多一層爽脆口感，我就貪心啲，一次過𢳂勁多餡，過足口癮。
順德釀油條$18.8
師傅：「呢個餸我自創嘅，呢頭都無見過有食肆咁樣做法，用新鮮鯪魚肉加蝦米、髮菜攪成爽口魚膠，再釀入油炸鬼，咬起嚟口感好得意。」
雲勝豆腐燜魽魚$18.8
傳統多數用火腩燜魽魚，但食落好膩，所以師傅就改用雲耳同勝瓜，清爽口感啱晒夏天食。魽魚則來自越南湄公河，肉厚且魚味鮮香。
欖豉脆皮田雞$18.8
足足用咗兩大隻田雞，4隻田雞腿點粉漿同椒鹽再炸，送啤酒一流，其他部位嘅田雞肉則切粒用欖豉炒，放進即炸脆口嘅雀巢之中，有得睇又有得食。
煲仔鹽焗骨$18.8
師傅：「我專揀啲肥瘦各半嘅腩排，咬落唔韌，醃過後先炸再炒，最後以鹽焗方式炮製，香口又夠入味。」
避風塘尿蝦皇2隻$38
師傅：「用避風塘手法香炒瀨尿蝦，先將隻蝦炸脆，再加埋香噴噴指天椒、蒜頭等配料一齊炒，包你未食已經流晒口水。」瀨尿蝦有差不多10吋長，勁多肉，$20唔使有一隻，想點？
食客有Say
搵食攻略
雍雅海鮮酒家（27537838）
地址：九龍灣牛頭角道177號1-2樓
營業時間：7:00am-12:00mn
座位：330個，設有數個偏廳
人均消費：$60-$70
有着數：惠顧晚市即送半隻燒乳鴿
最好賣：燒乳鴿，日賣200隻
註：抵食優惠即日至8月8日消夜時段（9:00pm後）