波歷克同舒夫真高加盟車路士後面對嘅第一個難題，竟然唔係爭正選，而係要唱歌仔。
事關車仔有個玩新人嘅傳統，每個新簽嘅球員都要喺一班舊人面前，企上一張櫈仔度唱歌。最慘嘅係唱得唔好嘅話，會俾台下嘅人用麵包掟。職業球員踢波就叻啫，要佢哋當眾獻唱，你都咪話唔攞命，「軍刀」貴為3,000萬鎊射手都話怕怕，要新隊友畀多幾日佢準備，不過新嚟新豬肉，睇嚟佢都係走唔甩㗎喇。
玩新人櫈上唱歌
中場祖高爾仲爆料，除咗領隊摩連奴之外，新加盟嘅球員無一倖免，又話自己當年「上車」時，一樣要上櫈仔唱歌，當時俾廸西里、華朗同基斯普等師兄望住，真係嚇餐死。聽講唱得最好嘅係啱啱過咗檔嘅杜夫，原來呢個愛爾蘭人嘅歌喉一啲都唔差。摩帥就好鍾意呢個傳統，話可以令球員打成一片喎。梗係啦，佢自己又唔使俾人玩。
講開車仔啲新兵，繼有舒夫真高話要將囝囝獻畀英格蘭，波歷克亦非常識做，仿效摩連奴鏟skinhead（平頭裝），加入「戰鬥格」行列。波歷克咁識撈，下季正選一定走唔甩；至於基斯普就濕滯啲咯，佢把招牌長髮一向唔肯剪，睇嚟今季都唔會受重用啦。唔知仲有幾多個車仔球員跟風鏟頭呢？
「我求大俠覺得波歷克個新look好睇過以前，而且又比較通爽，又可以討好老闆，一舉三得幾好呀。不過今季啲講波佬就辛苦啲囉，車仔個個光頭都唔知點認。」