熱愛日本風嘅香港女生，對波點圖案一定係情有獨鍾。日本人稱「水玉」的波點圖案，近年來愈來愈受歡迎，古老當時興嘅21世紀，利用小鳳姐最愛嘅黑底白點，加少少改動，就一樣咁有少女味。不過要襯得一身好「波點」都唔係咁易，究竟大、中、小波點要點樣配合先可以有靚靚效果呢？即睇NelNel教路。
記者：羅灝汶
攝影：楊錦文
Model：Fion@PureModel
波點Tube：記住加鏈
波點裙於6０、70年代大熱，當年邦女郎都着唔少。想打扮得青春又可愛，其實穿一件頭七彩波點Tube裙已經靚爆鏡，只需花多點心思於首飾配搭即可，粗大搶眼嘅頸鏈再加波點鬆糕鞋，搶眼又唔會老土。
小波點加短裙，簡單又容易襯，最緊要切合淨色襯波點的要訣，女生隨意配上飾物已經好好睇。
波點OnePiece：大點撞細點
波點設計除咗放喺Tube裙外，當然少不了OnePiece嘅傳統連身裙。上身以密度高的白色小波點為主，下身部份就用散落式大白點，設計上比較現代，而且顧及到波點分布比例，唔會過份搶眼，睇落舒服得多。建議女生穿TubeTop打底，甚至勇敢的真空上陣，絕對會有意想不到的效果。
吊帶裙可以有兩種穿法，一係露吊帶、二係收起吊帶。現時當然係後者有型得多，女生可以Show靚膊，一件頭着出街已經無敵啦。
波點背心：肥妹忌大點
波點背心絕對係流行之選，如果有BabyFat的女孩子建議穿小波點圖案會理想得多，大點會於視覺上突顯手臂粗大，要盡量避免啦。淨色短打熱褲可以襯托出上身的素白感覺，最啱性格爽朗嘅女孩子穿着，簡單的加一條木製彩珠頸鏈，去到邊都咁吸引人啦。
中波點白底小背心，加上小波點腰帶短褲，出奇地簡單效果非常好。用小波點腰帶作點題裝飾，「水玉」感覺強烈。
波點外套：切記撞淨色
想含蓄啲穿波點？一樣有辦法！內外都可以用淨色衣物去襯托波點外套，當然外套上要以沉色為主，斯文又大方，上身白色小背心加杏色半截裙，最啱性格含蓄女生。想效果更好可以加一對鬆糕鞋，再戴一個小頭飾，令到整體形象更加出，咁就唔會悶啦。
短身連帽黑色紅波點Jacket遇上藍色條子短褲，兩種格格不入的圖案，視覺上帶來衝擊，加上閃石腰帶，令平實嘅上身更加搶眼，比例上也很好看。
NelNel教路：咪亂撞
著名形象設計師張學潤（Nelson）：「想要波點襯得自然又好睇，我建議用淨色配合波點，最緊要唔好全身都係波點，否則就好古怪。如果想身上多點波點配搭，就要留意上、下身嘅波點大、小配合，如果上身細點，下身就盡量避免穿同等大小嘅波點。穿波點要講求視覺和諧，比例校得啱啱好就非常好睇喇。」
店舖查詢
（a）mylittlepalace（25377111）中環伊利近街16a號B4舖
（b）Breathe（25239398）中環伊利近街16a號B5舖
（c）DoubleStep（23888754）銅鑼灣地帶222號舖
（d）Eternal（34273382）銅鑼灣地帶224號舖