7月下旬獲瑞信推介買入的豐德麗（571），股價當真愈升愈有，昨日再升2.3％，收6.60元，短短一個星期多少少，股價計落升咗成蚊咁多，大行報告威力果然強勁。
經紀黃話，豐德麗所sell的澳門概念，愈來愈多芬佬受落，昨日又有基金申報揸多過5％。江湖傳聞，豐德麗喺澳門的發展項目，早前向澳門政府申請加大地積比率一事好似已有眉目，可能因此成為炒作藉口。
另外，昨日最多人談論的，唔係滙控（005）、唔係恒生（011），而係創業板股萬佳訊（8279），真係100歲唔死都有新聞，股價居然可以單日內由4.3仙炒上最高2.05元，升成40幾倍，最後收報0.83元，升幅仍有18倍。
萬佳訊成交金額只有686萬元，已計埋266萬元大股東配股上板，實際成交其實更加少，而股價mark得咁誇張，小初炒股咁多年，都係第一次見到。
慕容小初