左丁山認識賓架甚多，最近佢哋為咗「七天工作」，甚為煩惱。打銀行工，幾十年來五天半工作，有長短周，相安無事。政府自七月一日起開始實行五天工作，本來係好事，點知大銀行為咗搶生意，來一招五天工作七天營業（星期六日係有限度營業），於是天下大亂，其他銀行為咗防止客戶流失，唯有紛紛跟風，於是銀行好快就會五天工作，七天營業。對銀行界員工嚟講，簡直係一場革命。
過去銀行假期就係紅色日子假期，銀行工係好多人羨慕職業。左丁山初入銀行之時，阿媽唔知幾歡喜，以為佢個仔搵到一份人工好、前途穩定、逢假期休息嘅高尚職業。
唉吔，𠵱家做商業銀行就杰咯，年輕人入行被派往財富管理部、零售銀行部，一開波就受訓練推銷甚麼產品、按揭，而且有「配額」，要交數，銀行職員要企街派傳單，諗落就冇癮，𠵱家重話要輪更喺星期六、星期日工作㖭，過唔過份啲？不如恢復五天半工作好過，任由政府五天工作啦。
幾位老友之所以煩惱，正因為唔跟風，驚蝕底，照跟，好影響員工士氣，而且身為高層，只要有下屬返緊工，有分行開緊門，出咗乜嘢事都要負責，自己唔返工都囉囉攣，北上打高爾夫球都唔會安樂。
如何是好呢？左丁山同情員工，反對五天工作，七天營業。主張五天工作，五天營業，頂多為咗方便市民，五天半營業！香港有啲事好弊，學習西方，包學唔到好嘢，人哋講普選，我哋講選委會；人哋老早有普選，我哋一味話香港未有條件（因為香港人蠢啲，唔會選愛黨人士），人哋老早有五天工作，我哋竟然搞到五天工作，七天營業。你話競爭激烈喎，倫敦、紐約啲銀行唔識競爭呀！倫敦滙豐有冇七天營業呀？左丁山好懷疑點解會有人喺星期日早上走去銀行買基金，買保險。銀行試驗七天營業一段時間後，好可能發覺得不償失。