政府話要重新規劃舊啓德機場用地，點知民建聯唔鍾意，自己畀錢請人再規劃過，仲整咗個識[!FED3]燈嘅模型，擺係中環國金一期。擔大旗嘅陳鑑林噚日帶埋八和會館代表同埋成班地產商，好似合和、新世界同恒地嚟，諗住將偉大嘅構思公告天下。點知規劃署副署長黃婉霜踩場，仲批評個模型同政府嘅構思有好大出入。
黃婉霜話民建聯個設計，搞到舊啓德機場條跑道斷咗，仲話「大部份市民都想保留番條跑道」；又話政府建議起嘅體育館已經係地標，唔明為咩又整多個觀光塔嚟。搞到成日掛民意喺口邊嘅陳鑑林鬼咁冇癮。
班地產商一聽到黃婉霜嘅批評，即刻轉晒口風話要再研究。新世界執董兼總經理梁志堅仲話：「有好多問題政府知道，但民建聯未必知，政府咁規劃實有因由嘅！」陳鑑林面燶燶，惟有死死地氣約黃婉霜下個星期開會再研究。