長江實業為咗想將軍澳都會駅二期賣個「價靚量好」，早喺5月中已經開始搞搞震，一方面將二期改名叫城中駅；另方面又吹風話加價賣都會駅一期貨尾。
第一次5月份吹嗰次話加價3%，結果呢？5月底、6月初係賣咗一伙，不過，係減價賣樓噃！賣出單位係1座67樓H室，面積1219方呎，成交價802.7萬元。蘭西翻查紀錄，原來個單位舊年年中定價993.5萬，之後好快減到865.5萬，減咗近13%。𠵱家個成交價再減超過7%，前前後後足足減咗兩成。
吹加價 結果減
至於第二次吹加價係上月底，話加一成。即刻有無定向風吹埋嚟，話有個東南亞客買咗兩個同座同面積嘅12及18樓H室，成交價分別係918萬同963萬，而且仲要使5000萬掃城中駅啲大單位咁話。
蘭西諗，如果交易係堅，呢個東南亞豪客就真係魚腩嘞，用多成300萬買兩個低幾十層樓嘅單位不特止，仲唔知個市係點，都會駅6月至有一個5座21樓B室，蝕咗差唔多53萬走咗。
當然，交易究竟堅定流，遲多一頭半個月查土地註冊處咪知囉。不過，蘭西希望吹風嘅人好好諗吓，「講嘢要有人信至得㗎」。
電郵地址：[email protected]