港股連升6日，結束7月份的交易。恒指噚日最高衝上17114，升過159點，尾市回番，只升得16點。大市連升多日，調整已逼近眉睫，只要能守穩在10日線（16560、上升中）同20日線（16463、上升中）之上，整固後再上，恒指可望升穿17114，向另一個新高位進發。
五窮六絕七翻身，今年又一次完全應驗。5月恒指創高位17328後大幅回落，低收15857，大跌1471點，比4月收市亦跌逾800點。6月上半月繼續走緊絕路，6月13日恒指跌到落15205先反彈，下半月絕處逢生，以16267收市，比5月升410點。踏入7月終於大翻身，恒指出現幾個裂口式嘅突破升勢，埋單計數，升704點，重上萬七關水平，整固完成後，初步可向5月高位的阻力挑戰。以由5月中開始形成的複式頭肩底形態來衡量，後抽整固能守穩在頸線16600之上，量度上升目標係18000。
滙控（005）派成績表，06年（12月年結）中期賺87.29億美元，升15%，遠比市場預計的為佳，滙豐銀行獲利184.71億元，升5.2%。滙控預期下半年的增長會略為放緩，估計全年盈利168億美元，升11.4%，每股盈利1.5美元（折11.7港元），預期PE約12倍，近期已累積近4%升幅的滙控，預計在140元水平會有一段時間消化獲利貨，調整後有力再上。
傳今個月有大動作
個幾月前，買隻建星環保（8011），輸咗（跌10%就止蝕），其後股價就落到0.33元先定得住，形成大型嘅下降楔形，近日升勢再起，噚日就高收0.375元，衝破降軌阻力，並重上10日同50日線之上，短期若有力升破20日線（0.38元），則MACD亦會出現入貨訊號，中期調整確認完成，升勢再起，初步目標係6月高位0.495元。
建星已向採油業轉型，無疑係有得憧憬，收購汶萊西部一塊佔地逾3000平方公里油田8.4%權益，有權在3年內增持到42%，油田可能有5.6億桶石油蘊藏量，按市價計，估值可達390億美元。另外，中石化（386）母公司中國石化集團將提供技術建設及支援，唔排除以後會有更多合作。
最新消息，聽聞建星今個月會有大動作，股價隨時會有反應，高風險股通常係高回報，以0.33元為止蝕位持有，睇吓可以賺幾多？
郭兆誠